Navenda Nûçeyan
Cemîl Bayik diyar kir ku balafirên keşfê yên dewleta Tirk nikarin li Balîsanê gerîlaya tespît bikin û got, çekdarên PDK’ê dikarin hevalên wan tespît bikin û agahiyê bidin.
Hevserokê Konseya Rêveber a KCK’ê Cemîl Bayik di Bernameya Taybet a Stêrk Tv’yê de, derbarê bûyera Xilêfanê nirxandin kir.
Di 5’ê Îlonê de li devera Balîsanê ya Xelîfanê ya herêma Soran a girêdayî parêzgeha Hewlêrê, li dijî komek gerîlayên azadiya Kurdistanê êriş pêk hat.
Navenda Ragihandin û Çapemeniyê ya HPG’ê diyar kiribû ku Êvara 5’ê Îlonê tîmek ji gerîlayên wan li dora Balîsanê bûn hedefa êrişekê. HPG’ê dabû zanîn ku li gorî agahiyên ketine destên wan de, di vê êrişê de 3 hevrêyên wan şehîd bûn, 2 hevrêyên wan jî birîndar bûn û hêzên PDK’ê ew birine. HPG’ê da xuyakirin ku divê bûyer bê lêkolînkirin û zelalkirin, her wiha hevalên wan yên ji aliyê hêzên PDK’ê ve hatine birin, bêne berdan.
Hevserokê Konseya Rêveber a KCK’ê Cemîl Bayik di Bernameya Taybet a Stêrk Tv’yê de, diyar kir ku tişta li Balîsanê hatiye kirin niha li holê ye, li ser vê bûyerê şerê psîkolojîk jî dimeşînin, ji bo ku rastî dernekeve holê gelek agahiyên şaş û derew belav dikin. Bayîk da zanîn ku li gorî agahiyên ji wan re hatine, balafirên dewleta Tirk hevalên wan bombebaran nekirine, wan ji bo hevalên wan kemîn danîbûn, êrişê hevalên me kirine û wiha dirêjî da xaftina xwe: “Du hevalên me şehîd kirin, sê hevalên ku birîndar kirin jî li gel xwe birine. Di destê me de ev agahî hene. Ji bo ku ev rastî neyê fêmkirin, dibêjin, “Balafirên dewleta Tirk bomberdûman kiriye, piştre jî ew birîndar birine”. Balafirên keşfê yên dewleta Tirk nikarin li Balîsanê hevalên me tespît bikin, lê ew dikarin tespît bikin û agahiyê bidin. Ev bi destê PDK’ê û Barzaniyan rû dide. Divê gelê me bi vê yekê zanibe.”
Hevserokê Konseya Rêveber a KCK’ê Cemîl Bayik diyar kir ku ew li benda daxuyaniya li ser Balîsanê ya Xelîfanê ne û divê bûyer bê zelalkirin.