Ahmed Ataş
Êrîşên li dijî jinên Kurdistanî di dema dawî de zêdebûne û wisa xwuya dibe ku wê hîn zêdetir bibin!
Dijminê kurdan berê êrîşên xwe yên qirker; yên ser giştî û taybetî yên li ser jinê, dane Silêmaniyê. Mînaka herî dawî jî şehîdxistina Nagîhan Akarsel e(4.10.2022).
Sedemê ku bi taybetî qirkirina jinê kirine armanca xwe, tê zanîn: Ji ber ku êdî pêşengiya jinê ya Şoreşa Kurdistanê, ji aliyê raya giştî ve hatiye pejirandin.
Erê yê ku pêşengiya van êrîşên qirker û hovane hildaye ser milê xwe, dewleta Tirk e, Lê belê yê ev kar jî daye ser milê wê û xistiye destê wê de, hêzên hegemon yên cîhanê ne. Nîşana herî berbiçav jî, bêdengî û bêhilwestiya çapemeniya navdewletî ya li ser van êrîşên qirker yên li dijî jinên Kurdistanê ye.
Ev stratejiya malxerab ya nevdewletî, bi biryara hegemonên cihanî û bi destê MIT’a tirkan ve; di 9.1.2013’an de li Parîsê hate despêkirin. Bi êrîşa di 23.6.2020 de ya şehîdxistina rêveberên Kongra Star re dewam kir û heta niha jî, li gel şehadeta Nagihan Akarsel ve, bi berfirehî didome.
Aliyê vê siyaseta ku, çima li Silêmaniyê êrîş gûrtir bûne; bêgûman girêdana wê ya bi stratejî û siyaseta li dijî Tevgêra Azadiya Kurdistanê re heye. Vê dijberiyê jî, heta nuha bi hevkariya PDK’ê li Başûr bi giştî dide meşandin.
Erê heta niha bi giranî li Hewlêrê û herêmên di bin bandora PDK’ê de, vî karê xiyanetkaran dide meşandin. Lê di vê dema dawî de êdî dixwaze van êrîşên qirker û dagîrker, li herêmên di bin bandora YNK’ê de jî bidin meşandin.
Ma ev mînak ne balkêş e? Di salekê de bi tenê li Silêmaniyê, MIT’a Tirka 5 êrîşên kujerî pêk ani ye! 1-Yasin Bulut û Ferhat Bariş Kondu 2-Ferhat Şiblî 3-Zekî Çelebî 4-Suheyl Xorşîd Ezîz(Mamoste Şemal) 5-Nagîhan Akarsel û li pey hev hatine şehîdxistin.
Îca li vê qonaxê, êdî barekî mezin; him dikeve ser milê Tevgêrên Kurdistanî û gelê Kurdistanê bi giştî, him jî bi taybetî dikeve ser milê YNK’ê.
Li vir, êdî gelek pêwîstiya bangê ji PDKê re namîne, ji ber ku bi salane, li gel bi hezaran bang û reca jê re hate kirin, lê wê hevkariya xwe ya bi dewleta Tirk a dagirker re ne birî.
Hilbet bang û daxwaza taybet û girîng ji YNKê re divê, heke ji vê qonaxê pêve hilwesta xwe ya li dijî qirkerî û dagirkeriya dewleta Tirk re nîşan nede, mixabin dikeve warê hevkariya li gel dewleta Tirk!
Li aliyê din, di kesayetiya Nagîhan û Jîna de, xwedîderketina gelê me û Tevgêra Azadiyê ya li şehîdên şoreşê, her wiha hilwest û berteka wan ya di kesayita Îran û Tirkiyeyê de ya li dijî zordarî, dagirkerî û xiyanetê pir bi rûmet e.
Bêgûman, divê kes qîma xwe bi van xwepêşandan û çalakiyên hêja ku niha bi berfirehî didomin nîne.
Him dewletên dagirkerên Kurdistanê û him dewletên hegemon yên cîhanê jî, wê hewl bidin ku rûmet û deskeftiyên şoreşa gelê Kurdistanê û herêmê bixin bin bandora xwe.
Lewma hostayî û hişyarî divê!
5.10.2022
