‘Jîna Emînî sembola jina berxwedêr e’

Zana Roj/ Şehba

Ji bo şermezarkirina qetilkirina jina Kurd jîna Emînî û piştgiriya xwepêşandanên Rojhilatê Kurdistanê, li herêma Şehbayê meşek girseyî ji aliyê jinan ve hat lidarxistin.

Bi serperştiya Ji bo şermezarkirina jina Kurd ya bi navê Jîna Emînî ku li ser destê hêzên rêjîma Îranê hat işkencekirin û di encamê de şehîd bû, bi sedan jinên Kurd û Ereb û ji tevahî gelên herêma Şehbayê meşek li dar xistin. Jinêni beşdarî meşê bûn piştgiriya xwe bi xwepêşandanên li Rojhilatê Kurdistanê re anîn ziman, herwiha helwesta xwe ya li dijî tundiya li ser jinên Rojhilatê Kurdistanê tê feriz kirin , nîşandan.

Endama Meclîsa Jinên Azad ya Şehbayê Emel Ismayîl qetikirina Jîna Emînî şermezar kir û wiha got: “Îro em tevahî jinên Kurd û Ereb rabûne ser piyan û em wehşiyet û bêexlaqiya hikumeta Îranê a ku Jîna Emînî pê hatiye kuştin şermezar dikin, jin ne ji bo têrkirina xerîzeya zilam û girtin û heşimkirina wê di bin navê ol de hatiye dunya yê, ev dem dema azadiya tevahî jinên bindest e, divê tevahî jinên cîhanê êdî bi bindestiyê û tunebûnê qebûl nekin.”

Li ser navê Kongira Star a herêma Efrînê Leyle Îbiş axivî û wiha got: “Armanca hedefgirtina jinê, têkbirina îradeya wê ye, bi kuştin û işkenceyan dixwazin fikirên xwe yên paşverû û serdestiya zilam bidin ferz kirin.”

Leyla Îbiş axaftina xwe wiha qedand: “Bila tevahî dunya û sîstemên şofînî û serdest bibhîsin ku, her jinek xwedawendeke û hûn nikarin roja jinên azad tarî bikin, tevahî jinên kurd Jîna Emînî ne. “