navenda nûçeyan
Li Îranê û Rojhilatê Kurdistanê piştî qetilkirina Jîna Emînî berxwedan pêl bi pêl belav dibe û bertekên li dijî rejîmê dijwar dibin. Ji ber serhildan û nerazîbûna gel, li bajarê Şîno yê Kurdan polîs û leşkerên rejîma Îranê heza xwe ji kolanan vekişan din.
Li Îranê û Rojhilatê Kurdistanê piştî qetilkirina Jîna Emînî ya ji aliyê “polîsên exlaqê” ve berxwedanên bi pêşengiya jinan ve pêl bi pêl belav dibe. Tevî binçavkirin, girtin û êrişa leşker û polîsan, gel kolanên bajaran naterikîne û çalekiyên xwe xurttir dike.
Bajarê Şîno di bin kontrola gel de ye
Li gelek bajaran Îranê û Rojhilatê Kurdistanê leşkerên bimotorsîklet, polîs û hêzên paramîlîter re pir bi dijwarî êrişên xwepêşandanên gel kirin. Gel ji bo bi hêzên paramîlîter û polîsan re têbikoşe bi rêyan de rûn rijandin. Li gor agahiyên li ser medya dîjîtal, Kontrola bajarê Şîno (Oshnaviye) yê Eyaleta Rojhilatê Azerbaycanê ku li ser sînorê Herêma Kurdistana Federe de ye, ket destê gel de. Piştî berxwedana gel ya bi israr, hêzên leşker û polîsên rejîma Îranê neçar man ku xwe ji kolanên bajêr paşve vekişinin. Fenomenê twîtterê Tawheed Javadî di twîtterê de ev nivîs nivîsand: “Piştî şoreşa 1979’an cara ewil e ku kontrola bajarekê bi temamî kete destê xwepêşandan a.”
‘Ji Dîktatoran re mirin…’
Di çalakiyan de dirûşmeyên “Bila Xamenay bê kuştin”, “Ji dîktator re mirin”, “Em ê şer bikin, em ê bimirin, lê em ê Îranê paş ve bistînin”, “Bombe, tank, tiving êdî bandor nake, divê Molla derkeve” , “Ev sal e sala xwînê ye, serokê Îranê ha ket, ha dikeve” hatin bilinkirin. Bi pêşengiya jinan re serhildanên gel metirsiyekê pir mezin xistiye dilê rejîma diktator ya Îranê ku polis û leşkerên wê bi çekan raste rast êrişê malên gel dike. Lê çalekvan bi israr çalekiyên xwe roj bi roj mezintir dikin.
