Zana Roj/Şehba
Komîna Wênesaziyê ya Çand û Hûnerê li navçeya Til Rifet dest bi amedekariyên lidarxistina pêşengeha bi navê ‘Çand û Hûnera Kurdî ‘ya wêne û werhemên destan dike.
Li navçeya Til Rifet Komîna Wênesaziyê dest bi amedekirina vekirina pêşengeheke bi navê ‘Çand û Hûnera Kurdî’ dikin. Di pêşengehê de wê berhemên xwendekaran bên pêşkêşkirin, armanca wê jî rengê çand û hûnera Kurdî, her wiha rewşa koçberiyê a ku li ser gel hatiye ferz kirin bidin xuya kirin. Pêşengeh wê di 23’yê Îlonê de bê li dar xistin.
Têkildarî vê xebatê endamên ku tevlî amadekariya vê pêşengehê bûne ji rojnameya me re axifîn.
Endama Komîna Wênesaziyê Fatma Ehmed diyar kir ku tevî kêmderfetan wan pêşketinin berçav bidest xistine û wiha got: “Ev nêzî salekê ye em xwendekaran perwerde dikin. Tevî kêmderfetan; tobaran û dorpêça li ser herêmaTil Rifet, dîsa me dev ji fêrkirin û perwerdeyên xwendekaran berneda, me bi derfetên xwe yên kêm pêşketinên berçav bi dest xist.”
Fatme da xuyakirin ku hejmara xebatkarên ku tevlî pêşengehê bûne 12 xwendekarin û wiha got: “12 xebatkar tevlî amadekrina pêşengehê bûn, xebatkarên me temenên wan cuda ne, hin ji wan zarok û hin jî ciwanin. Armanca me pêşkêşkirina kevneşopî û çanda kurdî ye.”
Xwendekara bi navê Îvana Hebeş mebesta xwe ji wêneyên ku dane xêzkirin anî ziman û got:
“Bi 4 wêneyan ez tevlî pêşengehê bûme, nameya ku dixwazim bidim diyarkirin;êş û rewşa koçberiya ku gel tê re derbas dibe bi riya reng û firşeya xwe bidim derxistin, di heman demê de di hin wêneyan de min balkişande ser xweşikbûn û xwezaya Efrînê.”
Îvana Hebeş axaftina xwe wiha bi dawî kir: “Bi hêvî me ku ev pêşengeh bibe derman ji kul û xemên gelê Efrînê re, her wiha bi demê re em pêşengehên mezintir bidin vekirin û pêşketinên mestir bi des bixin.” 
