Mihemed Xanim / Qamişlo
Nivîskarê Morîtanî yê ciwan Mihemed Elemîn, diyar kir ku jina Kurd sembola jiyana Azad e û got, ti hevok nikarin lehengiya jina Kurd ya Ku ji kaniya fikrê Rêber Apo vexwariyê, şîrove bike.
Di dîroka hezarê salan ya gelê Kurd de, jinên Kurd yên ku pêşengî ji gel re kirine hene. Gelek ji wan bûne xet û sonda serketinê ya ji bo azadiyê. Herwiha di her serhildana civakî û siyasî de jinan cih girtiye û pêşengî kirine. Ev rêûresm di roja me de gihişt asta ku jinên azad li çiyayên Kurdistanê li hemberî artêşa dagîrkeriya tirk ku hêza duyêm ya NATO’ê ye, serkeftinên mezin bidest bixin û pêşengiya Şoreşa Rojava û ya jinên cîhanê bikin. Ev jinên têkoşer ji aliyê tevahî cîhanê ve weke mînak hatin dîtin. Bi dehan pirtûk û çîrok li ser lehengiya wan hatin nivîsandin.
Yek ji nivîskarên ku ilhama xwe ji lehengiya jina Kurd girtiye û çîroka pêşengekê ji pêşengên şoreşa Rojava nivîsandiyê, ciwanê Morîtanî Mihemed Alemîn e.
Mihemed Alemîn ji paytexta Morîtaniya, Newakşotê ye, ew di zanîngehê de başa wêje dixwîne, demeke dirêje ku nivîs û çîrokan ji bo rojnameyên Morîtanî dinvîse.
Ji ber ku têkoşîna jina Kurd û bi taybet di şoreşa Rojava de bandoreke mezin li Mihemed kir, wî çîroka şehîd Barîn Kobanê nivîsand û di Rojnameya Elweten ya morîtanî de belav kir.
Derbarê nivîsandina Çîroka Şehîd Barîn Kobanê û bandora lehengiya jina Kurd, Ciwanê Morîtanî Mihemed Elemîn ji me re axivî.
Mihemed diyar kir ku wî destpêkê bi riya hevalekî xwe yê Kurd şoreşa Rojava nas kir û wiha got: “Destpêkê bi riya hevalekî xwe yê Kurd min hin tişt li ser şoreşa Rojava nas kirin. Pişt re min bi riya destgehên çapemeniyê yên tevgara Azadiya Kurdistanê, şoreşa Rojava, Felsefeya Rêber Apo û lehengiya jina Kurd jî, nas kir. Bi riya xwendina pirtûk û ajansên Kurdî, ez ketim kurahiya dîroka doza Kurd û Kurdistanê; min pêşeng, Têkoşer û berxwedêrên Kurdan nas kirin.”
’Jinên tekoşer yên li çiyayên Kurdistanê mînaka azadiyê ne’
Tişta ku herî bala Mihemed kişandî, têkoşîna jinên Tevgera Azadiyê ya di Şoreşa Rojava de bû. Mihened wiha bal dikîşîne ser tekoşina azadiya jinê: “Çawa gelekî ku bi sedê salan zilm û zordarî li ser hatiyê kirin, di komkujiyan re derbas bûye, mafê jiyanê jê hatiyê stendin, zimanê wî qedexe bûye, dikare serî rake û dijminên xwe li ber lehiya têkoşînê bibe, ev rastiyeke û ev gel jî gelê Kurd e. Lê ya herî girîn ku banorekê mezin li mirovan dike, jina Kurd e. Ev jina ku dîrokekî wê ya dirêj bi têkoşînê re heye û jinên cîhanê hêza xwe ji têkoşîna wê girtin e. Jinên li çiyayên Kurdistanê ev zêdeyê 45 salane ku li hemberî dagîrkerên xaka xwe serî hildidin, bûne mînaka têkoşîna azadiya.”
’Jina Kurd pêşenga jinên azadîxwaz e’
Mihemed diyar kir ku ti hevok nikarin têkoşîna jinên Kurd şîrove bikin û wiha got:”Ya ku mirov matmayî dihêle, çawa li deverêkê wekî Rojhilata Navîn, ku jin ji tevaiya mafên xwe bêpare û nasnameya wê tune ye, Jinên Kurd serî radikin û pêşengiya şoreşê dikin, dibin pêşengên jinên azadîxwaz yên cîhanê. Bi rastî mirov matmayî dimîne, tu hevok nikarin têkoşîna jina Kurd ya ku ji kaniya fikrê Rêber Ocelan vexwariye, şîrove bike. ”
Dema ku Mihemed Elemîn Şoreşa Rojava dişopîne, ji gelê Kurd hez dike, fikr û felsefeya Rêber Apo ji nêz ve dixwîne. Ew fikrê Rêber Apo û Şoreşa Rojava, ji bo hevalên xwe yên zanîngehê şîrove dike. Herwiha ew dixwaze serdana Rojava bike û di nava gelê têkoşer de hinek dem derbas bike.
Mihemed Emîn da xuyakirin ku jina Kurd sembola têkoşînê ye û axaftina xwe wiha qedand: “Jina kurd sembola têkoşîn û berxwedanê ye; sebmola azadî û bedweiyê ye. Pêşenga jinên cîhanê û ya nifşên nû ye. Dema min, çîroka Şehîd Barîn Kobanî nivîsand, min hîs dikir ez di nava gelê rojava de jiyan dikim. Her kesê ku çîroka Şehîd Barîn xwendî, xwest ji nêz ve Şoreşa Rojava nas bike. ”