Navenda Nûçeyan /Qamişlo
PYDʹê diyar kir ku ew di wê baweriyê de ne ku hêza wan ya xweser têrê dike ku serkeftinê mîsoger bike û got, em soz didin ku layîqî fedakariya gelê xwe bin.
FacebookTwitterWhatsAppTelegram
Partiya Yekitiya Demokratîk (PYD) bi boneya salvegera 19ʹemîn a damezirandina xwe, peyamek weşand.
PYD’ê di peyama xwe de diyar kir ku ê têkoşînê dewam bikin heta ku armancên ku em ji bo wê tê dikoşînin, anku mîsogeriya mafên gelê Kurd û avakirina Sûriyeke demokratîk, mîsoger bikin û wiha got: “Partiya me li ser daxwaza gelê me ya têkoşîna ji bo çareserkirina pirsgirêka kurdî û misogeriya mafên wî yên rewa li Sûriyê hat avakirin. Partiya me xwe dispêre rêgeza neteweya demokratîk a ku hemû cureyên neteweperest, olperestî û zayendperestî red dike û ji bo ku ev armanc pêk werin, gelek fedakarî dan û roleke pêşeng di xurtkirina jiyana aşatiyane di navbera pêkhateyan de lîst.”
PYD’ê da xuyakirin ku partiya wa ji destpêkê û heta niha, partiyeke rizgariyê ye û wiha dewam kir: “Di pêşxistina sîstema hevserokatiyê de û pêkanîna wekheviya zayendî di rêziknameya xwe de pêşeng bû. Me şerê hemû cûre tundiya li ser jinan û hemû cûreyên qirkirina jinan kir. Em teqez dikin ku em ê têkoşîna xwe dewam bikin û hemû hewldanên xwe bikin heta ku azadî û wekheviya zayendî pêk were, ji ber ku em vê yekê bawer in ku jina azad a rêxistinkirî mîsogeriya civakeke demokratîk e.”
Partiya Yekitiya Demokratîk (PYD) da zanîn ku çawa wan di mercên herî zehmet derbas kirin, ew ê di merheleyên bê de jî derbas bikin û wiha qedand: “Em careke din soz didin ku em ê kar bikin ku li gorî baweriya ku gel daye me bin û layîqî fedakariyên wê be. Em di wê baweriyê de ne ku hêza me ya xweser têrê dike ku serkeftinê mîsoger bike, divê em bi vîn û îsareke xurt di vê rêyê de dewam bikin.”