Navenda Nûçeyan /Qamişlo
Xwepêşandanên ji bo şermezarkirina Kuştina Jîna Emînî ku li Rojhilatê Kurdistanê daketin kolanan, rastî êrişên hêzên dewleta Îranê hatin û di encamê de 5 kes hatin qetilkirin
Piştî kuştina jina Kurd Jîna Emînî ya 22 salî ji aliyê Polîsên Exlaqê yên îranê li Tehranê, xwepêşandanên şermezarkirinê li gelek bajarên Rojhilatê Kurdistanê destpê kirin û dewam dikin.
Li gorî Rêxistina Mafê Mirovan ya Kurd, di çalakiyên şermezarkirinê yên ku li gelek bajarên Rojhilatê Kurdistanê hatin lidarxistin, herî kêm 5 kesan jiyana ji dest dan û gelek kes jî birîndar bûn.
Li gorî agahiyên ku li ser medyayên civakî hatine belav kirin, li bajarê Seqizê 2 kes, li Dîwandereyê 2 kes, li Dehgulanê jî kesekî jiyana xwe ji dest dan.
Her wiha li gel van her sê bajaran û bajarên Mahabad, Bûkan, Ûrmiye, Sine, Kamyaran, Bicar, Qurwe Banen û gelek bajarên din, bi dehan kes birîndar bûn. Li gorî hin çavkaniyên xwecihî nêzî 100 kesî birîndar bûne.
Çalakiyên şermezarkirinê li bajarên Îranê jî belav bûn. Li Tehran û Meşedê, her wiha li zanîngehan çalakî pêk hatin û li dijî hikumetê dirûşm hatin qîrîn. Li navenda Tehranê roja Duşemê bi sedan kes daketin qadan, polîsan jî li dijî xwepêşandêran ço û gazên çavan dişewitînin bi kar anîn. Hate ragihandin ku gelek çalakger hatine destgîrkirin.
Di 13’yê îlonê de Polîsên Exlaqê yên dewleta Îranê Jîna Emînî li paytext Tehranê, li cihê derketina ji metroyê destgîr kiribûn û işkencekiribûn. 16’ê Îlonê Emînî li nexweşxaneyê jiyana xwe ji dest dabû, piştre cenazeyê wê li bajarên Seqizê yê Rojhilatê Kurdistanê li Goristana Ayçî hatibû veşartin. Çalakiyên şermezarkirinê jî piştî veşartina cenazeyê Jîna Emînî destpê kirin.