Navenda nûçeyan/ Qamişlo
KNK’ê kuştina Jîna Emînî ya ji aliyê hêzên dewleta Îranê ve bi tundî şermezar kir û bang li gel kir ku li dijî wan êrîşên dakevin kolanan û nerazîbûnê nîşan bidin.
Konseya Rêveber a KNK’ê bi daxuyaniyeke kuştina jina ciwan Jîna Emînî ya (22) ku ji ber êşkenceya polîsên Îranê jiyana xwe jidest dabû bi tundî şermezar kir.
KNK’ê di daxuyaniya xwe de diyar kir ku dagirker bi hincetên bê bingeh kuştina kurdan didomînin û got: “Jîna Emînî (Mehsa) ku jineke ciwan a 22 salî û xelkê bajarê Seqizê ye di dema çûyîna Tehranê bi hinceta ku laçke nedaniye serê xwe ji aliyê polîsên ku weke polîsên asayîşa exlaqî (dijî bê hîcabiyê) tên naskirin tê destgîrkirin. Piştre di bin êşkenceyê de tê şehîdkirin.”
KNK’ê da xuyakirin ku çend roj beriya vê tawanê xwefiroş û nokerekî rejîmê li bajarê Merîwanê xwest destdirêjiyê li ser jineke ciwan bike, wê jî ji bo parastina rûmeta xwe xwe li ser balkona malê avête xwarê û jiyana xwe ji dest da û wiha domand: “Ew hemû şêwazên cuda yên tawanan ên li wî welatî ji aliyê dezgehên fermî û polîsên rejîmê ve li ber çavên cîhanê tên kirin. Ew hemû tevî tepisandina hemû dengên azadî û edaletê bûne karnameya rejîma Îranê.”
Konseya Rêveber a KNK’ê di dawiya daxuyaniya xwe kiryarên rêjîma Îranê şermezar kir, sersaxiyê ji malbat, hevrê û dostên qurbaniyan re xwest û xelkê Seqizê xwest ku dakevin kolanan û li dijî wê tawanê dengê xwe bilind bilind bikin, êrîş û destdirêjiyên wiha qebûl nekin.
