Navenda Nûçeyan/Qamişlo
Piştî 22 rojan ji danîna nexşeya Kurdistanê li ser Zanîngeha Zaxo, dewleta Tirk nexşeya Kurdistanê da rakirin, tenê nexşeya Başûrê Kurdistanê hat hiştin.
Li gor zanyariyên ajansa ROJNEWS bi dest xistin, 12 Îlonê nexşeya Kurdistanê li ser Fakulteya Zanistên Mirovahiyê ya Zanîngeha Zaxo hat rakirin û li şûna wê nexşeya Başûrê Kurdistanê hat danîn.
Fakulteya Zanistên Mirovahiyê ya Zanîngeha Zaxo îsal di roja 20’ê Tebaxê nexşeya Kurdistana mezin li ser dîwarê xwe danabû. Lê piştî 22 rojan ev nexşe bi biryara
serokatiya Zanîngeha Zaxoyê, hat rakirin.
Çavkaniyek ku bûyiye şahidê bûyerê, ji ajnsa ROJNEWS re ragihand ku nexşe di saet 2-3’yê berbanga sibeha 12’ê Îlonê de hat rakirin û tenê nexşeya Başûrê Kurdistanê bi heman dîzaynê li ser dîwar hat danîn.
Li gor agahiyên hatîn bi destxistin, Wezîrê Hikûmeta Herêmê yê ji bo Karûbarên Pêkhateyan Aydin Maruf ku Tirkmene û bi nêzîkatiya xwe ya li gel dewleta Tirk tê naskirin, di rojên borî de serdana Beşê Zimanê Tirkî ya li Zanîngeha Zaxoyê kiriye û ev nexşeye dîti ye.
Li gor gotina çavkanî; dewleta tirk bi rêya Aydin Maruf zext li ser berpirsên hikûmeta Herêmê kiriye da ku ev nexşe li ser dîwarê zanîngehê were rakirin. Piştre jî ji serokê zanîngeha Zaxo re hatiye gotin ku divê nexşeya Kurdistanê bê rakirin.
Heta niha serokatiya zanîngeha Zaxoyê ti daxuyaniyek li ser sedemê rakirina nexşeya Kurdistana neda ye.
