Navenda Nûçeyan / Qamişlo
Partî û saziyên Kurdan ên li Ewropayê diyar kirin ku divê êrişa li ser gerîla ya li Xelîfanê bê ronîkirin. Herwiha bang li gelên Kurdistanê kirin ku li dijî dagîrkeriya tirkî berxwedanê bilin bikin.
52 partî û saziyên Kurdan ên li Ewropayê derbarê êrîşa li Xelîfanê daxuyaniyeke nivîskî weşand.
Partî û saziyên Kurdan ên li Ewropayê di daxuyaniya xwe de dan zanîn ku berxwedana gerîla ya li Zap û Metîna berxwedaneke neteweyî û wiha gotin: “Dewleta Tirk a dagirker ne tenê li dijî gerîla, êrîşî hemû nirx û destkeftiyên Kurdan dike. Geşedanên dawî me weke sazî û partiyên Kurdistanî yên li Ewropayê dixe li nava fikaran. Ev geşedan zirarê dide berjewendiyên netewî yên gelê Kurdistanê.”
Partî û saziyên Kurdan ên li Ewropayê dan diyar kirin ku dema gerîlayên azadiyê li hemberî planên qirêj ên artêşa Tirk a dagirker serkeftinên mezin bi dest dixin, li herêmên Başûrê Kurdistanê li dijî gerîlayên azadiyê êrîş pêk tên. Mîna êrîşa yekem ya 26’ê Tîrmeha 2021’an û ya duyemîn di 29’ê Tebaxa 2021’an de, niha jî ya sêyemîn di 5’ê Îlona 2022’an de pêk hat. Di van her sê êrîşan de heta niha bi giştî 12 gerîlayên azadiyê şehîd bûne. Ev her sê bûyer jî li benda zelalkirin û lêkolîneke cidî ne.
Partî û saziyên Kurdan ên li Ewropayê dan zaîn ku divê ev bûyer bê ronîkirin û bi lezgîn her du gerîlayên birîndar radestî yekîneyên wan bên kirin û wiha gotin: “Eger ev yek pêk neyê wê zerarê bide destkeftiyên Kurdistanê û rê li ber polîtîkayên komkujî û dagirkeriyê yên dewleta Tirk a mêtînger li Kurdistanê veke.”
Partî û saziyên Kurdan ên li Ewropayê banga hemû gel û aliyên Kurdistanê kirin ku li hember siyasetên dagirker û qirker yên dewleta Tirk a mêtînger yên li ser Kurdistanê, bi ruhê yekitiya netewî, ji berjewendiyên netewî yên gelê Kurdistanê berxwedanê bilind bikin.