Daîreya Teknîkî ya Desteya Rêveberiyên Herêmî û Jîngehê ya Rêveberiya Xweser a Bakur û Rojhilatê Sûriyê, îro dest bi projeya mezin a avakirina rêya di navbera Dêrik û Qamişlo de kir.
FacebookTwitterWhatsAppTelegram
Armanca vê projeyê ew e ku zexma li ser rêya Dêrik-Qamişlo sivik bibe. Dê Desteya Rêveberiyên Herêmî û Jîngehê rêyeke nû li seranserî bajar û bajarokên li ser xeta bajarên Dêrik û Qamişlo bi dirêjahiya 100 kîlometre ava bike.
Ev rê pir girîng e, ji ber ku deriyê Sêmalka bi herêmên Cizîrê ve girê dide û dikeve xizmeta 500 gund û bajarokên bakur û başûrê rê, ji bilî wê jî dikeve xizmeta bajarên sereke; Dêrik, Girkê Legê, Tirbespiyê, Çilaxa û Qamişlo.
Ev proje dikeve çarçoveya plana Desteya Rêveberiyên Herêmî û Jîngehê ya Rêveberiya Xweser a Bakur û Rojhilatê Sûriyê, ku rêyên navendî yên li Bakur û Rojhilatê Sûriyê sererast bikin da ku bar li ser şaredariyên gel sivik bibe û ji xizmetguzariyên bajar û bajarokan re vala bibin.
Daîreya Teknîkî armanc dike ku projeyên xwe yên giştî di demên pêş de zêde bikin û xebatê li gelek herêman bikin.
ANHA