Rêveberiya Xweser ya bakur û rojhilatê Sûriyê êrişa dewleta tirkî ya li ser navenda Fêrkirinê ya zarokên şermezar kir û got, êrîşên dewleta tirkî yên li dijî herêmê tevayiya qanûnan binpê dikin û emê hesab bixwazin.
18’yê vê mehê, dewleta tirkî ya dagîrker bi balfireke bêmirov êrişî navenda fêrkirinê ya zarokan ya li gundê Şemokê yê Hesekê ku Neteweyên Yekbûyî sponsoriya wê dike kir û di encama wê de 4 zarok şehîd bûn.
Derbarê êrişa dweleta tirkî ya dagîrker ya li ser navenda zarokan ya li gondê Şemokê de, Rêveberiya Xweser ya bakur û rojhilatê Sûriyê daxuyaniyek da.
’Di êrişên dewleta tirkî ya dgîrker de zarok dibin amanc’
Rêveberiya Xweser di daxuyaniyê de êrişên dewleta tirkî ya dagîrker ya li ser navenda fêrkirinê ya zarokên ya li gundê Şemokê yê Hesekê ku Neteweyên Yekbûyî sponsoriya wê dike, şermezar kir û wiha got: “Piştî hevdîtina dawî ya Erdogan bi aliyên navneteweyî û herêmî re, êrişên dagîrkeriya tirkî yên li dijî herêmên me zêde bûn. Di encama van êrişan de gelek sivîl, zarok û fermandarên li kêleka Koalisyona Navneteweyî li dijî rêxistina DAIŞ şer kirin şehîd bûn.”
’Êrişên dagîrkeriya tirkî tevayiya qanûnan binpê dikin’
Rêveberiya Xweser da zanîn ku êrişên dewleta tirkî ya dagîrker tevayiya pîvanan binpê dikin û wiha got: “Dewleta tirkî di çarçoveya şerê xwe yê qirkirinê de li dijî gel û herêmên me êrişên nû pêk tîne. Mînaka wê jî dewleta tirkî ya faşîst bi balafirên bêmirov navenda Fêrkirinê ya taybet bi jinan ya li gundê Şemokê ku tenê 2 km dûrî baregeha Koalisyona Navneteweyî ye ku Neteweyên Yekbûyî sponsoriya wê dike, kir amanc. Di encamê de 4 zarok şehîd bûn û 11 zarokên keçîn birîndar bûn. Ev êrişa hovane hemû pîvan û qanûnan binpê dikin û sûcên şer in. D i heman demê de şerê qirkirinê yê li dijî gelê me pêk tê ye û rûyê din yê DAIŞ`ê ye.”
Rêveberiya Xweser da zanîn ku ev êriş xeterê li ser zarokan, navendên fêrkirinê û sivîlan çêdike û wiha got: “Hincetên dewleta tirkî yên derew ji bo rewakirina êriş û dagîrkirina herêmên me ye. Xetera van êrişan rojane zêde dibe. Ev jî teqez dike ku Sûriye di binê xeter û gefa dewleta tirkî de ye û divê hemû sûrî vê yekê bizanin û dersan ji siyasetên dewleta tirkî derxin.”
Rêveberiya Xweser navên şehîdên zarok ku di êrişa balafira dagirkeriya tirkî de ya li ser navenda perwerdeyê ya zarokan ya li gundê Şemokê ya Hesekê eşkere kirin.
Li gorî daxyuaniya Rêveberiya Xweser navên şehîdan wiha ne: Ranya Eta, Zozan Zêdan, Dîlan Izedîn, Diyane Elo.
