Navenda Nûçeyan/Qamişlo
KCK diyar kir ku dewleta tirkî êdî li bakur û rojhilatê Sûriyê ti pîvanan nas nake û got, ji ber ku Artêşa Tirk a dagirker li Zap, Metîna û Avaşînê derbên giran xwariye û li van deveran asê maye, hovane êrişî herêmên rojava dike. Lê di vî pêvajoyîde derfet hene ku li Rojava derba mirinê li artêşa Tirk were xistin.
KCK diyar kir ku dewleta tirkî êdî li bakur û rojhilatê Sûriyê ti pîvanan nas nake û li dijî hêzên QSD, YPG, YPJ û Hêzên Asayîşê êrişên hewayî û sûîqestan dike, li dijî mirovên sivîl komkujiyan dike. Li hemberî şehîtxistina şervan û fermandarên li Rojava, ji aliyê koalisyonê ve nasnameya kujerê êrişkar nayê bilêvkirin û bi vî rengî peyamên sersaxiyê û xemgîniyê têne dayin. Ti qîmetê van peyaman nîne.
Hevserokatiya Konseya Rêveber a KCK’ê li ser êrişên dagirkeriyê yên dewleta Tirk daxuyaniyek da.
Daxuyaniya KCK’ê wiha ye:
“Dewleta Tirk a faşîst li xaka Bakur û Rojhilatê Sûriyê û Başûrê Kurdistanê-Iraqê di êrişên qirkerî û dagirkeriyê de; zarokên herî hêja yên gelê me, gerîla, sivîl, şervan û pêşengên polîtîk qetil dike. Ji daxuyaniya Komîteya Karên Hundir a Rêveberiya Xweser tê fêhmkirin ku hevserokê berê yê KODAR’ê û endamê Konseya Rêveber a KODAR’ê Rêzan Cavîd ku ji bo tecrûbeyên şoreşê û karên yekîtiya neteweyî li Rojava bû, di êrişa dewleta Tirk de hate qetilkirin. Di şexsê Rêzan Cavîd de em şehîdan hemûyan bi rêz, minet û hurmet bi bîr tînin. Ji gelê Rojhilat, di serî de malbata Rêzan Cavîd ji tevahiya malbatên şehîdan û gelê me re sersaxiyê dixwazin.
Çekên Qedexekirî Têne Bikaranîn
Êrişên qirker û îmhayê yên dewleta Tirk ên li ser gelê Kurd li her qadê bi rengekî bêperwa dewam dikin. Rojava, Şengal û Mexmûr li pêş çavên Neteweyên Yekbûyî, DYA, Rûsya û Yekîtiya Ewropayê di çarçoveya planekê de têne bombekirin, li Zap, Metîna û Avaşînê jî di şerê dijî gerîla de artêşa Tirk bi rêk û pêk sûcê şer dike. Li van herêman li dijî gerîla çekên taktîk nukleer, bombeyên termobarîk û gazên kîmyewî têne bikaranîn.
Ev ne tenê îdîayek e, lê rastiyeke ku bi îtirafeke cidî hatiye ser ziman. 23’ê Adara 2022’an ji artêşa Tirk pîlotê teqawîtbûyî Erdogan Karakûş beşdarî bernameya televîzyonekê bû û diyar kir ku di destê artêşa Tirk de çekên taktîk nukleer hene û mikur hat ku ev çek îro li dijî gerîla têne bikaranîn.
Piştî Civîna Soçiyê Êriş Zêde Bûn
Piştî civîna NATO’yê ya 32’emîn ku 22’ê Hezîrana 2022’an li Madrîdê hate lidarxistin, hevdîtina Pûtîn-Erdogan-Reîsî ya 22’ê Tîrmeha 2022’an li Tehranê pêk hat û hevdîtina Pûtîn-Erdogan a 5’ê Tebaxa 2022’an li Soçiyê hate lidarxistin, êrişên hewayî û bejahî yên artêşa Tirk ên li ser Rojava zêde bûn, Erdogan û wezîrên wî ji nû ve dest bi daxuyaniyên dagirkirina Rojava kirin.
Dewleta Tirk êdî li bakurê Sûriyê û li Rojava ti pîvanan nas nake, li dijî hêzên QSD, YPG, YPJ û Hêzên Asayîşê êrişên hewayî û sûîqestan dike, li dijî mirovên sivîl komkujiyan dike. Hewl dide gel ji gundan koçber bike, li şûna wan çeteyan bi cih bike, li pêş çavên cîhanê sûcê qirkirinê dike. Di êrişên dawî de eşkere bû ku mirovên sivîl ên hewl didan cenazeyan û mirovên birîndar ji wesayitên hatin bombekirin derxînin cara duyemîn hatin bombekirin. Ev yek jî armanca êrişan radixe pêş çavan.
Bêdengî Êrişên Dîktatoriya Erdogan Zêdetir Dike
Gelên li Rojava, Bakur û Rojhilatê Sûriyê di serî de, Kurdên li her çar parçeyên Kurdistanê dijîn, hay ji meseleyê hene. Heqîqet ev e, li hemberî êrişên li ser gelê Kurd û şervanên ku di şerê li dijî DAIŞ’ê de di nav Koalîsyonê de bûn, hêzên Koalîsyonê ji dêvila gelê Kurd çavê xwe ji êrişên desthilatdariya Erdogan û Dewleta Tirk a faşîst ku di şer de piştgirî dida DAIŞ’ê re digire. Ev bêdengî zemîna êriş û dagirkeriya ku wê TC û dîktatoriya Erdogan li ser Rojava bike, xurttir dike.
Piştgiriya Ku Hûn Didin Dewleta Tirk Vekişînin
Tirkiye her dem qala ‘Herêma ewlekariyê’ (qadên dagirkeriyê) dike ku li van deran rêveberiya bilind a DAIŞ’ê û tîmên wan ên çalakiyan lê hene. Ne tiştekî veşartî ye ku DAIŞ li van qadan tê parastin û perwerdekirin. Piştî Bexdadî her du rêveberên DAIŞ’ê yên ku ketin şûna wî li van qadên ku di bin kontrola Tirkiyeyê de ye û li ser sînor hatin kuştin û girtin û ev jî diyar dike ku ev qad ji bo kê û ji bo kîjan armancê wekî ‘qada ewlekariyê’ hatine îlankirin.
NY di serî de em bang li DYA û Rûsyayê dikin ku nebin şirîkê polîtîkayên qirkirina li ser Kurdan a ku dewleta Tirk dike, bila piştgiriya ku didin dewleta Tirk a faşîst, qirker û mêtinger vekişînin û li gorî berpirsyariyên xwe tevbigerin.
Derfet Hene Ku Derbeke Mirinê Lê Were Xistin
Li gorî van rastiyan gelê me yê li Bakur û Rojhilatê Sûriyê û yên li Rojava divê li hemberî êrişên nû û potansiyel ên dewleta Tirk a dagirker bi hêza xwe û bi dînamîkên xwe amadekariya xwe bikin, li hemberî artêşa Tirk a faşîst û çeteyên wê dîsa ji biçûkan heta mezinan têkeve nav parastina bi giştî û mezin a welat. Artêşa Tirk a dagirker li Zap, Metîna û Avaşînê derbên giran xwariye û li van deveran asê maye. Derfet hene û mumkun e ku li Rojava derba mirinê li artêşa Tirk were xistin.”
