Navenda Nûçeyan/Qamişlo
Bi dirûşmeya’Em banga Rûsiya û Amrîka dikin ku asîmanê Rojava beramberî balfirên Tirkiyê were girtin’ welatiyên bajarê Qamişlo meşek li dar xistin.
Îro seat 10’an de, welatiyên bajarê Qamişlo bi dirûşmeya’Em banga Rûsiya û Amrîka dikin ku asîmanê Rojava beramberî balfirên Tirkiyê were girtin’ meşek girseyî li dar xistin. Meş ji çarxeriya Basil dest pê kir û heta deriyê Balafirxaniya bajarê Qamişlo ku bingeheke leşkerî ya Rûsiya li wir heye dewam kir.
Welatiyan bêdengiya Rûsiya li hemberî êrişên dagîrkeriya tirkî şermezarkirin û wêneyên şehîdên êrişa taxa Sîna ya bajarê Qamişlo hildan.
Meş li ber deriyê Balafirxaniya bajarê Qamişlo hat rawestandin. Destpêkê welatî xulekeke rêzgirtinê li ser giyanê şehîdan rawestiyan. Piştî wê Hevserokê Saziya Malbatê Şehîdan Mesûm Hesen axivî û da xûyakirin ku gelên bakur û rojhilatê Sûriyê dixwazin bi aştî û aramî bijîn.
Hesen diyar kir ku bi saya berxwedana gelên bakur û rojhilatê Sûriyê çeteyên DAIŞ’ê têkçûn û wiha got: “Pêwîste Rûsya û tevayiya hêzên cîhanê ji bîr nekin ku gelên herêmê di ber cîhanê de berdêlên mezin dan. Bi saya şehîdên me gelên cîhanê îro bi aramî dijîn”
Hêjayî gotinê ku dagîrkeriya tirkî vê sibê gundewarên Qamişlo, Amûdê , Dirbêsiyê û Til Temirê dane ber topan û derbarê ziyanan de jî hîn tu agahî nehatine bidestxistin.