Kemal Akif ragihand ku ti hevdîtinên siyasî di navbera Rêveberiya Xweser, MSD û hikumeta Şamê de çênebûne û got, gotegotên derveyî ragihandina fermî ya Rêveberiya Xweser û MSD`ê, ne rast in.
Berdevkê Daîreya Têkiliyên Derve ya Rêveberiya Xweser ya bakur û rojhilatê Sûriyê Kemal Akif têkildarî gotegotên derbarê hevdîtinên di navbera Rêveberiya Xweser û hikumeta Şamê de, li ser malpera fermî ya Rêveberiya Xweser bi daxuyaniyeke nivîskî diyar kir ku ti hevdîtinên siyasî di navbera wan û rejima Şamê de çênebûne û di daxuyaniyê de wiha hat diyarkirin:
“Di demên dawî de hin aliyan da xuyakirin ku hevdîtin di navbera Rêveberiya Xweser ya bakur û rojhilatê Sûriyê, Meclisa Sûriya Demokratîk (MSD) û hikumeta Şamê de çêbûne û hinan ji wan behsa hevdîtin, şert û nuqteyên binakok kir. Hemwextî wê em dibêjin ku li gorî rêgezên diyalogên niştimanî em tev digerin ku lihevkirin û istiqrareke sûrî-sûrî mîsoger bibe. Di heman demê de em dibêjin ti hevdîtinên siyasî di navbera me û Şamê de çênebûne. Li Kobanê û Minbicê di çarçoveya peymana parastina sînor ya 2019`an de peyman di navbera QSD`ê û artêşa Sûriyê de hene. Gotegotên derveyî çarçoveya fermî ya Rêveberiya Xweser û MSD`ê, derew in.”