Tevlîbûna Meclisa Leşkerî ya Til Temir zêde dibe
Endamê Rêveber yê Nivîsgeha Tevlîbûnê ya Meclisa Leşkerî ya Til Temir diyar kir ku bi zêdebûna gef û êrişên dewleta Tirkan ya dagîrker yên ser herêmê re, tevlîbûna nava refên meclisê zêde bûye.
Êrişên qirkirin û dagirkirinê yên dewleta Tirk a dagirker û çeteyên wê yên li ser Bakur û Rojhilatê Sûriyê zêde bûn. Di demên dawî de dewleta Tirk gefên dagirkirina herêmên nû xwarin. Li hemberî van gef û êrişan gelên herêmê tedbîrên parastinê digirin û tevlêbûna nava Meclisa Leşkerî ya Til Temirê zêde dibe.
Endamê Rêveber ê Nivîsgeha Tevlêbûnê ya Meclisa Leşkerî ya Til Temirê Dilşad Ebadî li ser mijarê ji ANHA’yê re axivî û got: “Li gel gef û êrişên domdar ên dagirkeriya Tirk û çeteyên wê yên li ser herêmên me, em dibînin ku tevlêbûna ciwanan nava refên me zêde dibin. Di du mehan de tevlêbûna nava refên me ji berê zêdetir bû. Di vê demê de 200 kes derbas kir, tevlêbûn roj bi roj zêde dibe.”
Dilşad Ebadî diyar kir ku kesên tev li meclisê dibin ciwanên herêmê û gundên Til Temir û koçberên bajarê Serêkaniyê ya dagirkirî ne ku tevlêbûna nava refên parastinê hilbijartine da ku herêmê xwe biparêzin û yên dagirkirî rizgar bikin.
Ebadî diyar kir ku ew ciwanên ku tev li meclisê dibin dişînin akademiyan da ku perwerdeyan bibînin û piştre li gorî pêwîstiyan li eniyên şer werin belavkirin.
Têkildarî perwerdeyên li akademiyan têne dayîn, Ebadî wiha got: “Perwerdeyên ku li akademiyên leşkerî têne dayîn ji yên berê cûda ne, ji ber ku me karîbû tektîkên xwe biguherin, berovajî rewşa me ya beriya êrişên li ser bajarên Efrîn, Serêkaniyê û Girê Spî. Ji ber ku em îro li hemberî dagirkeriya Tirk û balafirên wî rû bi rû ne. Dijminê me îro nikare êrişî xaka me bike, tevahî êrişên wê bûne bi çekên giran û yên hewayî. Ji ber vê yekê me tektîkên xwe guhertin.”
Endamê Rêveber ê Nivîsgeha Tevlêbûnê ya Meclisa Leşkerî ya Til Temirê Dilşad Ebadî di dawiya axaftina xwe de ev peyam da ciwanên herêmê “Dewleta Tirk a dagirker û çeteyên wê gefan dixwin û rojane êrişî herêmên me dikin. Ev yek ji her kesî re diyar e. Li herêmên dagirkirî jî sûcan li dijî niştecihên resen dikin. Ji ber vê yekê divê ciwanên herêmên me û niştecihên wê xwe berpirsên parastina vê xakê û gelên wê ji her êrişekê bibînin, xwe bi rêxistin bikin û li hemberî her xeterî û êrişan bisekinin.”
