Navenda Nûçeyan/Qamişlo
Li Navenda Çand û Huner ya Mihemed Şêxo ya bajarê Qamişlo Belgefîlîma şehîd Nûjiyan hat pêşandan û bi dehan jin, ciwan û gelên bakur û rojhilatê Sûriyê beşdarî pêşandana Belgefîlîmê bûn.
Beriya ku belgefîlîm destpê bike derhênera belgefîlmî, Jînda Asmen bixêrhatina beşdaran kir û da zanîn ku, ev belgefîlîe bi tîmekê ji 3 kesan hatiye çêkirin û wiha got:” Divê em bizanibin ku xwediyên vê keda mezin şehîdên wek, heval Nûjiyan yên vê şoreşê ne. Me jî xwest çirûskek ji keda van şehîdan bi geklê xwe û yê cîhanê re bidin nasîn.”
Herwiha Jînda Asmen teqez kir ku armanca wan bîranîna şehîd Nûjiyan û hemû şehîdên azadiyê ye.
Belgefîlm bi deqîqeyekê rêzgirtinê li ser giyanê şehîdên azadiyê dest pê kir. Di belgefîlmê de, kurtedîroka têkoşîna Nûjiyan Erhan li Şengalê, kiryarên hovane yên DAIŞ`ê li dijî êzidiyan, kurtejiyana wê ji Ruha heta çiyayên Kurdistanê, Mexmûr, Şengal û Rojava tên bibîrxistin.
Belgefîlm behsa rastiya jina şoreşger, civaka kurd ya êzidî û rastiya êrişên qirkirinê yên dagîrkeriyê dike.
Di belgefîlmê de, zaroktiya Nûjiyan û dîmenên birîndarbûna wê, dîmenên kesên ku nas dike, çîrokên jinên şoreşger û têkoşîna jinan di pêkanîna azadî û edaletê de hene.
Hêjayî bibîrxistinê ye ku amadekariyên belgefîlmê sala 2019`an li Şengalê cihî ku çalakvan û rojnameger Nûjiyan Erhan ser erkê xwe yê xebatê Rojnemegeriyê dest pê kiribû. Fîlm sala 2021`an bi dawî bû û cara yekemîn di 26`ê Gulana 2022`yan de li Şengalê hate pêşandan.