Faruk Sakik
Di 8’ê Hezîranê de di rojnameya Yenî Ozgur Polîtîkayê de nivîsa Veysî Sarisozen, bi sernivîsa “PDK dixwaze li Metîna çi bike?” derket.
Veysî Sarisozen ne Kurd e. Komunîstekî kevin û navdar e. Sarisozen, di destpêka nivîsa xwe de dibêje; Ey.. xwendekarno, hûn dizanin ez ti carî derbarê nakokî û nîqaşên partî û tevgerên Kurdan de şîrove nakim û nanivîsim. Ez dest nadim karê wan yê navxweyî. Lê hewldanên PDK’ê yên dawî ez jî neçar kirim ku binivîsim.
Baş e… Çi bû ku Veysî Sarisozen neçarî vê nivîsê kir?
Dibêje; Di vî şerî de eger dewleta Tirkan bi ser bikeve wê bi tenê Kurd têk neçin. Hemû gelên ku bi PKK’ê û gerîla bawerî anîne û ew hêviyek dîtine jî wê têk biçin. Veysî Xoce ji bo vê yekê hêrs bûye.
Erdoganê li ber têkçûnê ye, li rê û rêbazeke xelasiyê digere. Derdora Erdogan vala bûye. Mixalefeta Tirkiyê di serî de Kiliçdaroglu, ji HDP’ê û hêzên demokrat cesaret girtiye êrişî Erdogan dikin.
Îro Erdogan dixwaze 2 fotogarafan li eniya şerê li dijî Kurdan bikşîne û bi serketineke sexte biçe hilbijartinan. Ew 2 fotograf ev in: Fotografek li Metîna û fotografek jî li Til Rifet li sînorê Minbic e.
Ji bo fotoyê yekem ev 2 sal in êrişî Herêmên Parastinê yên Medyayê dike û bi ti awayî nikare encamê bigire. Êrişên li hemberî Metîna, Zap, Avaşînê parçeyekî vê planê wî ne.
Ev 2 sal in gerîla hewesa wan di gewriya wan de dihêle û di pozê wan de derdixe. Bi ti awayî nikarin fotografeke serkeftinê bikişînin û ji nijadperestên Tirkiyê re servîs bikin. Çi kir? PDK xist dewrê..
Li bakurê Metîna di navbera hêzên gerîla û dewleta Tirkan de şer diqewime. Li rojhilatê Metîna jî şerekî gelekî giran dewam dike. Dema ku hêzên PDK’ê aliyê başûrê Metîna bigirin, hingî pîlana dorpêçkirin û tinekirinê ya dagîrkeriyê wê temam bibe. Bi vî rengî wê PDK tevli vê pêvajoya tinekirinê bibe. Ev jî ji bo PKK’ê tê wateya îlana şer.
Bi hin nûçeyan wê raya giştî ya Kurd li dijî gerîlayên azadiya Kurdistanê bên sorkirin. Wê bibêjin gerîla êrişî PDK’ê kir. Heke ji vê encam neyê bidestxistin, wê li dijî gelê Başûr hin êriş bên kirin û van êrişan bixin stûyê gerîla. Bi vê yêkê wê şer were îlankirin.
Heke şer dest pê kir wê PDK ji Tirkiyê alîkariyê bixwaze. Piştî demekî jî wê dewleta Tirkan bikeve başûr ji wê derê derbasî Metîna bibe û fotografekî par ve bike. Lîstik û provokasyona îro li wê derê ev e.
Fotografê duyem jî dixwaze li derdora Minbicê li Til Rifet bikişîne. Li Til Rifetê wargeha Şehbayê heye. Koçberên ji Efrînê li wê derê dimînin. Dewleta Tirkan dixwaze bikeve vê heremê û dagîr bike.
Wezîrê Karê Derve yê Rûsyayê Sergey Lavrov li Enqerê bi Wezîrê Karê Derve yê Tirk Mevlut Çavuşoglu re hevdîtin pêk anî. Di vê hevdîtina ku bi rojan bû her kes li bendê bû û bi taybetî medya Tirkan xwe ji şer re amade kiribû tiştek derneket (10-06-2022).
Lê israra dewleta Tirkan ya bidestxistina 2 fotogarafa dewam dike. Tirsa Erdogan ya dîn jî, dibîne Kurd jî piştî dagîrkirina Serê Kaniyê bûne xwedî tecrûbeyên mezin. Ji bo parastina xwe ya rewa bi rêxistin dibin.
Hêzên Parastiana Kurdistanê-Şervan amadekariyeke mezin dikin. Ew jî dibînin ev hêza şervanan ne bi tenê di pozisyona parastinê de ne, di heman demê ji bo rizgarkirina heremên dagîrkirî jî çalakiyan li dar dixin. Gelek caran ji van çalakiyan encamê digirin û ev yek jî di nava gelê heremê de, dibe sedema motîvasyon û moraleke mezin.