Fener…
Idrîs Henan
Yek ji taybetiyên nûjen yên desthilatdaran ew e ku; weke mirîşkan berî hêkan bikin qîreqîj dikin û derdorê bi dengê xwe yê çirimî gêj dikin. Ev demek e wisa li hêkkerê çelq Erdogan hatiye ku; hewl dide li şûna pînikan li ortan hêkan bike û her kesî li dora xwe kom bike. Fena morikên ku ecel û mirina wan nêz dibe, bi bask bûye.
Demek e fena gurê devbixwîn belaya xwe li têkoşîna gelan çi li hundir û çi li derve dide. Li derve hewl dide êrişên xwe dewam bike û xeta ku bi salan e jê re amedekariyê dike, serguha bike. Ji bona wê jî li hundir zemîna wê dide avakirin ku pêşengên civakê binçav dike û dengê heqîqetê ditepisîne. Hemû hêza xwe ya stûxwariyê xistiye meriyetê û berê xwe geh li Amerîka û geh jî li Rûsyayê dide. Êdî şertên zeman û mekan rê nadinê û ne jî teşeya desthilatdariya dixwaze ava bike, rê didiyê ku van projeyên xwe zindî bike. Ji lew re, em dibînin ku mutefiqên wî yên bingehî jî wî red dikin û gotegotên wî paşguh dikin. Eger fêm neke jî, rasterast jê re dibêjin. Lê weke her kesê xurifî bawer nake ku yê serê wî li kêvir dikeve ew e ne kesekî dîtir e.
Bi êrişên 17ê Nîsanê yên li ser Herêmên Parastinê yên Medyayê re, hewl da dinyayê bide iqnakirin ku xwedî projeya çareserker yê li herêmê ye. Ji lew re, weke şansê dawî, piştgiriya mutleq ya teknelojî, siyasî û aborî danê ku van êrişên xwe bi ser bixe. Lê hesabên firoşkarên ser ker û qantiran li hesabên dikanciyan û peyasê nehatin û ne jî hev û din girtin. Wî – Erdogan – digot; çend roj in û ezê qira gerîla bînim û hemû çiyayên Kurdistanê desteser bikim. Pişt re jî ezê berê xwe bidim kurtêlxwarên xwe – PDK – û ji nav bibim ku heya ebûecdadan bibin ders û ibret. Lê ev yek nebû. Kilît di derî de asê ma û “pencên” dirêjî deriyên Zagros-Torosan bûn hatin şkandin. Ji ber vê jî, her bostek qadên berxwedanê yên Zap, Avaşîn, Xakûrkê û Metîna veguherî mayînekê û di rûyê celadên dîrokê de teqiyan. Ne teknelojiyê û ne jî çekên kîmyayî, ne teqemeniyê û ne jî bombebaranê feyde li azweriyên faşîst Erdogan kirin. Berûvajî; projeya xeyal ku rojê deh caran lê israr dike û sond dixwe ku wê pêk bîne, bi derbên gerlîlayên azadiyê re li ber candanê ye. Ji bona wê, careke din berê xwe da bakur û rojhilatê Sûriyê û hewl da plana ‘B’ pêk bîne û mesela penaberên Sûriyê xist dewrê. Lê weke şagirtê ku erkên malê pêk neanîbin lê hat. Jê re hat gotin; pêwîst e plana xwe ya ‘A’ biqedînî û pişt re berê xwe bidî pêngava duyem. Ji bo wê jî hinek peywirên jê dihatin xwestin hebûn.
Di berxwedana gerdûnî û qehremaniya li hemberî êrişên dagîrkeriyê hatine raberkirin de, hemû hesabên li ser kaxezan û ên di bin maseyan de li hev ketin. Fena çêlçûkên xwe çeteyên DAIŞ lê hat, dema xwestin êrişî Kobanê bikin, bi berxwedan û lehengiya wê çaxê hatiye nîşandan re, hemû mutefiqên DAIŞ ji paş reviyan û lê qulibîn. Wan rojan jî çeteyên DAIŞ mîna mirîşka hêkan dike, ji ber derbên gerîlayên Kobanê, kirin qîreqîr û hêkên tê de asê man. Îro jî hêkên Erdogan asê mane. Baş dizane li kû derê dibe bila bibe, dixwaze Minbic an jî Til Rifet be, dê encamên qîreqîra wî fena encamên çeteyên wî DAIŞ ên li dora Kobanê bin û dê mutefiqên wî jî, bi saya berxwedana bête raberkirin, ji paş vekişin.
