Enternasyonalîstên ji bo piştgiriya Şoreşa Rojava berê xwe dayîn herêmê û ji aliyê PDK’ê ve hatîn astengkirin, diyar kirin ku wê piştgiriya Şoreşa Rojava bidomînin.
Di binê sîwana Tûgayên Xebatê yên Navneteweyî de, ji welatên cuda yên cîhanê 26 enternasyonalîst li hev civiyan û berê xwe dan Rojava. Dema ciwanên enternasyonalîst gihan Deriyê Sînor yê Pêşxabûr, hêzên PDK’ê bi behanyeên vala pêşiya wan girtin û rê nedan ku derbasî Rojava bibin. Li ser vê yekê enternasyonalîstan daxuyaniyek da û di daxuyaniyê de ev hat gotin: “Em komek çalakvanên navneteweyî ku ji gelek welatên cîhanê pêk tên piştgiriya xwe ya ji bo şoreşa Rojava û Rêveberiya Xweser ya bakur û rojhialtê Sûriyeyê nîşan didin.”
’PDK’ê rê neda em derbas bibin’
Di dwama daxuyaniyê de wiha hat gotin: “Destpêkê em çûn başûrê Kurdistanê. Ji bo derbasî rojavayê Kurdistanê bibin me berê xwe da Deriyê Sînor yê Pêşxabûr yê di navbara başûr û rojavayê Kurdistanê de. Deriyê sînor di binê rêveberiya PDK’ê de ye. Hêzên PDK’ê rê nedan ku em derbasî Rojava bibin û rê li me girtin. PDK’ê bi hevkariya Tirkiyê ambargo daniye ser Rêveberiya Xweser. ji ber vê ambargoyê PDK rê neda ku em derbas bibin.”
’Bêdeng nemînin û dawî li qedexeya li ser PKK`ê bînin’
Enternasyonalîstan di dirêjiya daxuyaniya xwe de wiha got: “Em vê ambargo û zexta PDK’ê û dewleta tirkî ku bakur û rojhilatê Sûriyê dike hedef, şermezar dikin. Şerê ne hiqûqî yê dewleta tirkî yê li ser Tevgera Azadiyê ya Kurd şermezar dikin. Balkêş e ku NATO û dewletên din li ber sûcên şer yên Tirkiyê bêdeng in û şirîk in. Divê firotina çekên kîmyayî, firotina balafirên şer, qedexekirina li ser PKK’ê û piştgiriya Tirkiye bi dawî bikin. Em dixwazin dawî li girtina deriyê sînor bê anîn û ambargo bi dawî bibe. Divê NATO û Yekîtiya Ewropa dawî li qedexeya li ser PKK’ê bînin, dawî li desteka xwe ya Tirkiye bînin, rêgiriyê li çalakvanên şoreşger yên li seranserî cîhanê berê xwe didin Rojava nekin.”
’Piştgiriya me ya ji bo şoreşa Rojava wê dewam bike’
Enternasyonalîstan soza dewama piştgiriya xwe ya ji bo şoreşa Rojava da û daxuyaniya xwe wiha qedandin: “Em ji hemû çalakvanên Navneteweyî û kesên demokrasîxwaz yên cîhanê daxwazî dikin ku piştgiriyê bidin şoreşa Rojava û hemû kar û xebatên ji bo aştiya li Kurdistanê tê kirin, bikin. Em piştgiriyê didin dawîanîna ambargoya li ser Rojavayê Kurdistanê. Ji bo wê wê meha pêşiya me koma duduyan ya çalakvanên Navneteweyî bê Kurdistanê û piştgiriya xwe ya ji bo şoreşa Rojava û şkandina ambaroyan bikin. Rê nehat dayîn ku em sînor derbas bikin, ev tenê beşeke ya xebata me ye ya li dijî faşîzim û milîtarîzmê. Hewldan û tevgera me ya ji bo jiyaneke azad bi dawî nabin.”
ANF
