Dijwar Ehmed Axa
Alîkê Hesenê Dao zilamekî tiral ji Stilîlê ya herêma Mêrdînê ya bakurê Kurdistanê bû. Bêkar û bêkêr bû, loma dema Ingilîz sala 1920`an, ketin Iraqê, ji bo kar bike û xwe û zarokên xwe xwedî bike Alîko berê da Mûsilê.
Xortekî Stilîlî hebû hê ji Alîko tiraltir bû û bêkar bû. Ji Alîko xwest ku wî jî bi xwe re bibe. Alîko qebûl kir lê bi șertê ku bibe xulamê wî. Welhasil, hê çend gund ji Stilîlê derbas nekiribûn, Tûr avêt milê xort, satilek xist destê wî û berê wî dan nava gundan da ji wan re parsê bike. Bi wî awayî Alîko xwe û zaroyên xwe gihandin Mûsilê. Li wir jî xort ma karê pars bike. Lewra Alîko fêda xwe tê de dît, bi taybetî dema ku dît xelkên Mûsilê bajarvanî ne, xwarina wan paqij û xweș e.
Ji dû xort Alîko xaniyek ji xwe re kirî û rewșa xwe xweș kir. Rojekê zilamekî Stilîlî rastî xort tê û dibîne ku tûrê wî tijî nanê germ û sîtila wî goșt û birinc û tirșik tê da ye. Jê diprse dibêje, tu li vir çi dikî? Xort dibêje, ez li cem mala Alîkê Hesenê Dao me. Zilam jê re dibêje ma Alîko ji te re baș e? Xort bersivê dide, dibêje bi Xwedê xalo Alîko ji min re baş e, lê jina wî Nûrê ne baş e, nahêle ez têr nan bixwim. Zilam jê re dibêje, hey xwelîser ma kê bi destê te girtiye, li qorzîkê rûne û têr bixwe û yê ku ji ber te ma ji wan re bib dîno.
Îca em bên ser rewșa xwe ya niha. Hin ji me Kurdan bûne weke wî xortê Stilîlî, xulamê xulaman in. Rêjima Tirk, Ereb, Faris, xulamên dewletên mezin yên weke Rûsya û Amêrîka ne, yên me jî dibin xulamên wan. Lê ya me ji xulamtiyê wir de çûye. Mînak, karê ku niha li bașûrê Kurdistanê ji milê ve PDK`ê tê kirin asta xulamtiyê derbas kirye û gihiștiye dijminiya gelê Kurd. De ka em bi hev re lê meyze bikin. Kesên ku birayên xwe têxin dorpêçê û dora wan digirin û têxin kemînan digihê kîjan astê? Ma ev ne dijminatî ye? Derveyî wê dema ku tu biçî û bidî pêșiya dijmin û cihê gerîlayan û çeperên wan nîşanî dijminê xwe bikî, ma ev ne dijminatî ye?
Êdî bes e. Bes e xulamtî… Bes e dijminatî… Dijmin bêminet e bila bê qadên șer û wê xwe bibîne, berê jî xwe dît û qehremaniya ku li Avașîn, Metîna, Warxelê, Girê Sor bi çavan dît. Niha jî li Zapê rojane bi dehan leșkerên xwe yên kuștî û birîndar dikșîne.
Divê her kes bikeve wê ferqê, ku tișta çeteyên PDK`ê dikin gihiştiye asta dijminatiyê …
Ey xulamên xulaman bes e …
