Navenda Nûçeyan
Karayilan ji gerîlayan re peyivî û got, berxwedana gerîla kûçikên duling yên bi Kurdî diaxivin û kûçikên çarling jî şkandine û xwest bi heman cesaretê û bi pêşxistana afirîneriya di taktîkê de serkeftin bê avakirin.
Fermandarê Biryargeha Navenda Parastina Gel Mûrat Karayilan xîtabî gerîlayên li Zapê kir û got, “300 şervanên Spartayî yên ku destan nivîsandin, derbên giran li Împaratoriya Persan xistin. Şêrên Zapê jî di dîroka berxwedanê de pêvajoyeke nû didin avakirin
Mûrat Karayilan ji ser cîhazê xîtabî wan gerîlayan kir yên ku li herêma Zê (Zapê) li dijî êrişa dagirker a dewleta Tirk a dagirker ji 17´ê Nîsana 2022´yan ve şer dikin. Karayilan derbarê berxwedana mezin a gerîlayên HPG û YJA-Starê de jî agahiyên balkêş dan.
Piştî silavkirina şervanan, Karayilan şehîdê berxwedanê bi bîr anîn. Wî paşê got, “Va ye, 40 roj diqedin. Îro li herêma Zapê û Werxelê berxwedaneke dîrokî heye. Em dizanin ev bi kedeke pirr mezin tê meşandin. Bi keda şehîdên qehreman, bi keda we hevalan, bi fedakariya we hevalan ev berxwedana dîrokî, ewqas roj e bi şêwazekî serketî tê meşandin. Li hemberî me dijminekî nijadperest, faşîst û hov heye. Qendî faşîst û hov e, ewqasî jî tirsonek e, bêbext û nemerd e.”
Serkeftinê ava dikin
Ji bo berxwedana gerîlayan a mezin ew teşbîha 300 Spartatiyan dike: “Di dîroka mirovahiyê de 300 zilamên Spartayî yê Yewnan ên cengawer li hember artêşa împaratoriya Pers, bi rojan li ber xwe didin, destanekê ava dikin. Artêşê hemûyî radiwestînin û wisa berhemekê ji bo dîroka şer, ji bo dîroka mirovahiyê ava dikin. Cengawerên Apoyî jin û zilam in. Cêwaziya xwe ew e. Jin û zilamên Apoyî yên li ser hişmendiya Rêber Apo xwe perwerde kirî, xwe wisa kiriye egîd, cengaweriya wan a îro heye. Lê em dizanin 300 şervanên Spartayî destanek ava kirin û derbeke mezin li împaratoriya Pers xistin. Feqet şêrên Zapê tenê wê destanê ava nekin, bi vî şêwazê berxwedanê, ew ê di heman demê de zaferekê ava bikin.”
Hûn tevahiya
Başûrê Kurdistanê diparêzin
Murat Karayilan berxwedana gerîlayan weke bendeke li dijî tûranîzmê bi nav kir û got, “Îro hûn li hember vê nijadaperestiyê, tûranîzma îttîhat teraqqiyê vê berxwedanê dikin. Û hûn li wir, li Zapê tenê ne herêma Rêkanî û Nêrweh diparêzin. Hûn di şexsê herêma Rêkan û Nêrweh de esasî tevahî Başûrê Kurdistanê diparêzin. Statuya Başûrê Kurdistanê diparêzin. Hûn di heman demê de tevahiya gelê Kurdistanê, destketiyên gelê Kurdistanê, hebûna gelê Kurdistanê û azadiya gelê Kurdistanê diparêzin.”
Werin cenga azadiyê
Fermandarê NPG´ê Karayilan bal bire ser tecrîdkirina Rêber Abdullah Ocalan jî û got, “Çawa ku Rêber Apo ev 24 sal in, li hemberî sîstema êşkenceyê ya Îmraliyê bi îrade û sebreke mezin radiweste, li ber xwe dide, em şagirtên Rêber Apo jî divê li çiyayên Kurdistanê, li her devera Kurdistanê heman ferasetê temsîl bikin. Îro hûn vê temsîl dikin, hûn vê dimeşînin.
Niha em dizanin, ev ne hêsanî ye û em jî jê ne dûr in. Divê gelê me jî zanibe, tevahiya dostên me zanibin, yanî ev barekî giran e. Ev fedakariyeke mezin e, ev ne tiştekî hêsanî ye, 24 saet li hember vî dijminê hov li dij bombebaranê, li dij gaza kîmyewî sekinîn ne tiştekî ji rêzê ye. Yanî ne hêsanî ye, artêşa NATO ya duyemîn tu 40 rojan rawestînî û tu bixwazî têk bibî. Beriya her tiştî, ev îdîayeke mezin e, ev tenê bi serê xwe cesareteke mezin dixwaze.”
Kûçikên bi Kurdî diaxivîn hebûne
Karayilan ji şervanan xwest afirîneriya xwe ya di warê taktîkê de bêhtir bi pêş bixin:
“Di warê taktîk de divê afrînerî pêş bixînin. Diyar e, dijmin dixwaze di nav hêzê xwe de şêwazê êrişê bi pêş bixîne. Feqet heya niha bi ser nexistiye. Van demên dawiyê êrişên wan ên li ser Girê Cehennemê, herî dawî li ser Şikefta Birîndaran, cardin ê li ser Werxel ê Şehîd Şahîn, ê Kurêjahro vê raber dike. Niha bi xwe nikanin, kûçikan dişînine û haşa kûçikê însan dişînin, Kurdan dişînin. Mixabin, mixabin, ma ne di êrişa li ser Girê Cehennemê de hevalan got; ên bi Kurdî hem jî bi Soranî diaxivin hebûn. Ew kî ne? Divê mirov wana tespît bike, feqet dewleta Tirkiyeyê di dîroka xwe her wisa kiriye. Jê re dibêje ‘kûçik bi kûçik bide kuştin’.
Wisa xuyaye çeteyên hemû deveran kom kirine, hem çeteyên Kurd, hem çeteyên Ereb kom dikin, dixwazin bi wan ji xwe re hêzeke wisa şer ava bikin. Ango rêbazên êrişê bi pêş bixin. Lê cardin bi ser neketin. Ji ber ku kûçikên du ling nikarîbûn bi ser bixînin, îcar kûçikên çar ling dişînin.
Xuyaye wê dijmin hîn zêde giranî bide ser gazê. Yanî rêbazên nemerd, rêbazên bêbext, rêbazên alçax wê pirr zêde bi kar bîne. Divê heval li hemberî vê bi tedbîr bin. Divê rê û rêbazên we yên kûr hebin, aqilmendî hebe, hesasiyeteke mezin hebe û hem jî di warê bipêşxistina taktîk de bi heman şêwazî divê hûn di hûrguliyan de kûr bibin. Detay pirr girîng in.
Niha beriya her tiştî, tunelên me kelehên me ne. Îro kelehên bin erd hene. Kelehên binerd jî tunel in.”
Karayilan silav li berxwedêrên Avaşînê, yên li Werxelê şand, berxwedana wir bi şêyî nirxand, û xwest ew temamê Avaşînê bikin meydana karê tîman. Wî xwest afirînerî di taktîkê de bibe esasê li pêş ê ji bo berxwedanê.