Desteya Rêveberiya Herêmî û Jîngehê ya herêma Cizîrê armanc dike ku zeviyên çandiniyê li herêmê zêde bike. Di vê çarçoveyê de projeya avakirina daristaneke sînaî li Mizgeftê ya li gundewarê Tirbespiyê bi dawî bû.
Desteya Rêveberiya Herêmî û Jîngehê ya herêma Cizîrê, bi koordîneya bi Rêveberiya Çandinî û Avdanê re ji meha Nîsanê ve, projeya avakirina daristaneke sînaî li herêma Mizgeftê ya bakurê rojhilatê navçeya Tirbespiyê ya Qamişloyê bi dawî kir.
Desteyê bi rêya gerînendetiyên jîngehê yên girêdayî wê armanc dike ku rûberên çandiniyê û kesk li herêmê zêde bike. Da ku pêşî li çolistanê bigire, avhawa û qirêjiya jîngehê baş bibe.
Li daristana sînaî ya Mizgeftê 3 hezar û 430 darên hawirdorê li rûberek ji 4 hektar hatin çandin.
Ew dar bi jenetoran ku avê ji bendavê dikişînin tên avdan û bi rêya boriyan digihîne daristanê.
Proje bi beşdariya pispor, endezyarên çandiniyê, pisporên avê û koordînaya daristanên sînaî, di çend qonaxan de hat pêkanîn.
Hevserokê Desteya Rêveberiya Herêmî û Jîngehê ya herêma Cizîrê, Silêman Ereb ji ANHA’yê re got: “Ev yekemîn proje li herêma Cizîrê ye ku li gorî avhaweya herêmê ye û armanca wê ya sereke zêdekirina rûberên çandiniyê ye.”
Silêman Ereb bal kişand ser girîngiya daran û zêdebûna wan li her herêmekê û piştrast kir ku ew di paqijkirina hawayê de dibe alîkar.
Ereb diyar kir ku deste hewl dide projeyên mîna vê li Dêrik û Çilaxa de jî pêk bîne.
Piştî ku Desteya Rêveberiya Herêmî û Jîngehê proje bi dawî kir, radestî Desteya Çandinî û Avdanê kir, da ku xizmetî wê bikin.
Rêveberiya Xweser piştgirî dide însiyatîfên ku çandina daran li herêmê teşwîq dikin. Silêman Ereb bal kişand ser ku ew amade ne însiyatîfan li dar bixin, avê dabîn bikin û piştî çandina daran parastina wan bikin.
Gerînendetiya Jîngehê ya herêma Cizîrê gelek caran dest bi pêngava paqijkirina Mizgeftê kiribû û bang li welatiyan kiribû ku girîngiyê bidin paqijiyê û parastina daran.
ANHA
