Ji ber komek ku li pêşiya Navenda Giştî ya HDP’ê civiya, polîsan dor li avayiyê girt. Amirê polîsan gef li Ayşe Acar Başaran ya HDP’yî xwar û jê re got, ezê te li bin guhê dîwêr bixim.
Di bin ewlehî û parastina polîsan de komek anîn ber Navenda Giştî ya Partiya Demokratîk a Gelan û xwestin çelengê deynin ber avahiyê û daxuyaniyekê bide.
Koma ji 3 kesan ku îdîa dikir zarokên wan li nava PKK’ê ne, bi alên Tirk daxuyanî da û piştre çû. Tevî vê yekê jî polîsên Tirk li ber avahiyê sekinîn. HDP’iyan diyar kirin ku polîs dixwazin li pêşiya avahiyê provokasyonê bikin û nerazîbûn nîşan dan. Polîsan jî bi devkî û fîzîkî êrişî HDP’iyan kirin.
Berdevka Meclîsa Jinê ya HDP’ê û Parlamentera Êlihê Ayşe Acar Başaran nerazîbûn nîşanî provokasyona polîsan da û xwest daxuyaniyê bide çapemeniyê. Dema ku Acar Başaran got, “Ez ê daxuyaniyê bidim” polîsan çapemenî ji herêmê dûr xistin. Ji bo Acar Başaran jî got, “Wekîl bixin hundir.” Başaran axaftina xwe dewam kir û got, “Polîs ji bo provokasyonê bike hatiye ber avahiya me. Çelengek heye, polîs ji bo parastina vê çelengê hatiye wezîfedarkirin. Ji xwe re maf dibînin ku êrişî me bikin.”
Başaran bi biryardarî xwest daxuyaniyê bide û got, “Mafê min ê demokratîk asteng dikin. Em ê li hemberî provokatoran û êrişan têk neçin.”
Amîrê polîsan jê re got, “Bêje ku zarokên van li ku ne.” Başaran jî bavê xwe yê ku di salên 1990’î de bi kiryar nediyar hate kuştin bi bîr xist û got, “Wê demê li kujerê bavê min jî bipirse.”
Li ser vê bersiva Başaran polîsan heqaret lê kir û ji Başaran re got, “Ez ê te li bin guhê dîwêr bixim.”
Başaran û endamên HDP’ê nerazîbûn nîşanî polîsan dan.
Dorpêça polîsan a li ser Navenda Giştî ya HDP’ê dewam dike. HDP’î jî dirûşma “HDP gel e gel li vir e” diqîrin.
ANF
