Navenda Nûçeyan
Desteya Ciwana ya Herêma Cizîrê, bi armanca pişxistina û alîkariya jinên Jinwar`ê, kargehek dirûtina cilan vekir.
Endama Ofîsa Jinan ya Desteya Ciwana ya Herêma Cizîrê Nadiya Xelîl diyar kir ku, proje ji bo alîkarî û pêşixstina jinan bisûd e. Nadiya axaftina xwe wiha domand: “Projeya kargehê ji 2016`an ve di plana me de bû, lê ji ber kêmbûna derfetan, me projeya xwe sekinand. Berî demekê me serdana gundê Jinwar`ê kir, xwesteka wan ew bû ku fêrî dirûna cilan bibin. Dema ku me dît pêwîstiya wan pê heye, me dest bi pirojeyê kir.”
Nadiya Xelîl diyar kir ku, wê piştî Cejina Remezanê dest bi fêrkirina jinan li ser dirûna cilan bikin û heta mehekê dewam bikin. Herwiha Nadiya da zanîn ku, eger di mehekê de ew jin baş fêr nebin, wê meheke din jî dirêj bikin.
Nadiya got, piştî fêrbûna jinan wê berhemên wan li bazaran werin firotin, da ku pirojeya wê ya taybet hebe.
Nadiya Xelîl axaftina xwe wiha bi dawî kir: “Armanca me jê ew e ku, jin bi keda destê xwe li xwe xwedî derkevin. Bi vê armancê emê gelek projeyên wiha bisûd û biberhem, vekin.”
