Girtiyên li Girtîgeha Amedê ya Jimar 1, li dijî işkence û binpêkirinên mafan, ji bo 3 rojan greva birçîbûnê dan destpêkirin û bang li rêxistinên civaka sivîl kirin ku li dijî zulma li girtîgehan bêdeng nemînin.
Li girtîgehên Kurdistan û Tirkiyeyê, li dijî îşkence û pêkanînên xerab her ku diçe grevên birçîbûnê belav dibin. Girtiyên siyasî yên di Girtîgeha Amedê ya Jimare 1’ê de, li dijî binpêkirinên mafan dest bi greva birçîbûnê kirin. Hat ragihandin ku çalakiya greva birçîbûnê îro dest pê kiriye û dê 3 rojan bidome.
Girtiyê bi navê Beran Eman ê 23 salî ku li navçeya Nisêbîn a Mêrdînê di dema qedexeya derketina derve ya di 14’ê Adara 2016’an de hatî îlankirin de, hat girtin û 35 sal û 10 meh ceza lê hat birîn di derheqê îşkenceya di zîndana de û çalekiya gireva birçibûnê, bi rêya telefonê malbata xwe re axivî.
Îşkence û Gef
Eman diyar kir ku di demên dawî de îşkence pir zêde bûye û danê sibehê gardiyan avêtine ser qawîşên wan û belesebeb bela xwe di girtiyan dane û gef li wan xwarine û gotine “Hûn ê hêza dewletê bibînin.” Eman, bibîr xist ku di demên dawî de li girtîgehê nêzîkatiyên kêfî yên gardiyanan pir zêde bûne û li Bloka C’yê bi dehan gardiyan girtî Umît Ozkan, Mehmet Kasim Aslan û Dogan Ozbahçeçî ji qawîşê derxistine û birine cihekî kamera lê tune ne û li wir li wan xistine.
Îşkence bi dawê nebe wê çalakî veguhere greva bêdem
Eman ragihand ku girtiyan rapora derbkirinê girtine û paşê girtiyan birine qawîşeke din. Herwiha da zanîn ku piştî pêkanînên 14’ê mehê yên danê sibehê, li Girtîgeha Jimare 1’ê ji bo sê rojan greva birçîbûnê destpêkirin e û ger îşkence bi dawî nebin dê greva xwe veguherînin greva bêdem.
Eman, ji bo tespîtkirina pêkanînên li girtîgehê bang li Baroya Amedê, Komeleya Hiqûqnasên Ji Bo Azadiyê (OHD) û Komeleya Mafên Mirovan (ÎHD) kir ku li hember hovîtiyên girtîgehê erkê xwe pêk bînin.
ANF
