Firqeya 4’an ya girêdayî hikumeta Şamê ambargoyeke dijwar li ser welatiyên taxa Şêxmeqsûd û Eşrefiyê danîne. Li gel wê jî li lîsteya madeyên ambargokirî madeyên destpêkê ku dikevin çêkirina cilûbergan û betariyan hatin zêdekirin. Bi wê re wê bi dehan kargeh û karkerên wan werin rawestandin.
FacebookTwitterWhatsAppTelegram
Ji rêzekiryarên bêserûber ên hikumeta Şamê ji ferzkirina ambargo û qedexekirina derbasbûna madeyan li taxên Şêxmeqsûd û Eşrefiyê yên Helebê, îro Firqeya 4’an qedexe kir ku madeyên çêkirina cil û bergan û betariyan derbas bibe.
Bi vê yekê dê aboriya li her du taxan rûbirûyî aloziyekê be, gelek pirsgirêk werin afirandin; ji wan jî bêkarî û nedabînkirina pêdiviyên sûkên herêmê.
Nêzî 7 hezar welatî di pîşeya dirûtinê de dixebitin ku li 500 kargehên taxên Şêxmeqsûd û Eşrefiyê ne. Di wan kargehan de cilên amade tên çêkirin û rêjeyek baş ji sûka Sûriyê re dabîn dikin.
M.X yek ji xwediyên kargehên dirûtinê yê li taxa Şêxmeqsûdê ye ji ajansa me re wiha axivî: “Dê bi qutkirina dayîna caw re gelek kargehên çêkirina cilên amade û çente werin girtin. Di encamê de bi hezaran karkger bê kar dimînin û wê bêkarî çêbibe.
Di heman demê de jî bi dehan kargehên taybet bi çêkirina betariyan li herêma Şiqeyêf a Şêxmeqsûdê hene ku xwestekên sûka Sûriyê ji betariyan peyd dikin.”
Li aliyekî din jî A.C yek jı kargehên çêkirina betariyan wiha got: “Firqeya 4’an qedexe kir ku madeyên çêkirina betariyan derbasî taxê bibe bi taybet jî qurşîn, li gel wê jî nehişt betariyên çêdikin ji taxê derkevin. Dê bi wê re kargehê rawestin û gelek karker werin sekinandin.”
Firqeya 4’an a girêdayî hikumeta Şamê ji 13’yê vê Adarê ve ambargoyeke tund li ser taxên Şêxmeqsûd û Eşrefiyê yên Helebê ferz kir, nahêle ard û sotemenî derbas bibin. Ji wê zêdetir jî madeyên destpêkê yên pîşesaziyan jî qedexe kir derbasî her du taxan bibin.
ANHA
