Serbest Etê/Qamişlo
Hevseroka HDP`ê ya şaxê Mêrdînê: Kampanya dersa zimanê hilbijartî pir girîg e. Lê ne çareseriya bingehî ye. Divê civak bi zimanê xwe bawer be, jiyana bi kurdî bipejirîne û bi kampanyayên mezin bixebite û bi tiştên piçûk neyê xapandin.
`Ji bo qirkirin û tinekirina Kurdan zimanê wan tê qedexekirin`
Li ser kampanya dersa zimanê hilbijartî ya zaravayê kurmacî û dimilkî ya li bakurê Kurdistanê û Tirkiyê, Hevseroka HDP`ê ya şaxê Mêrdînê Pêrîhan Agaoglu ji me re axivî.
Pêrîhanê destpêkê bal kişand ser girîngiya zimên û got, zimanê her gelî nîşana herî xurt ya dîrok û paşroja wî ye. Lê mixabin gelê Kurd bi teybet li bakurê Kurdistanê heta van salên dawî jî derfetên ku bi zimanê xwe perwerdeyê bibîne nedîtiye. Sîstema desthildar bi armanca tinekirina hebûna gelê me, ziman û çanda me qedexe kirine.”
Lîstik û xapandinên desthilatê
Hevseroka HDP`ê diyar kir ku tevî hewldana tinekirin û qirkirina çandê ya li hemberî gelê Kurd, rejima desthilatadar ya Tirkiyê li hemberî xebata û têkoşîna çandî serî li lîstik û xapan dide û ev agahî da: “Xebata doza ziman û çanda kurdî li bakur heye. Bi rastî hewldanên mezin ji aliyê me ve tên kirin. Lê ji aliyê desthilatê ve bi rêbazên veşartî ji 2012`an heta niha hê xepandina mezin didomîne. Mînak bi vekirina kanalên mîna TRT-6 dixwaze li gorî xwe û sîstemê qalibekî kurdî ava bike. Ji ber hesreta ziman ya di dilê Kurdan de, desthilat bi polîtîkayên xwe dixwaze Kurdan bixe binê kontrola xwe. Ji ber nasnekirina rastiya xwe gelek Kurd hatin xapandin û gotin, `binêrin kanala TRT-6 bi kurdî tê weşandin û dewlet derfetê dide me`. Herwiha li zanîngehên Tirkiyê hin polên zimanê kurdî hatin vekirin, lê ev tev xapandin in. Divê mirov baş fêm bike ku divê Kurd li bakur bi van polîtîkayan, neyên xapandin û bi tiştên piçûk yên ji bo xapandinê razî nebin.”
`Pirsgirêka Kurdan bi zimanê hilbijartî nayê çareserkirin`
Li ser kampanya Dersa Zimanê Hilbijartî ya ji 3`ê Çile heta 7`ê Sibatê dewam kirî, Pêrîhan wiha axivî: “Bi rastî Kampanya dersa zimanê hilbijartî ya her du zaravayê kurmancî û dimilkî, kampanyeke pir girîng e û em jî piştgir in. Lê divê di vê astê de nemîne. Lewra em wê bes nabînin. Ji ber wê HDP`ê pêngava fermîkirina zimanê kurdî dest pê kiriye. Li hemberê vê pênagavê, bi zimanê hilbijartî AKP-MHP dixwaze asteng bike. Divê bê zanîn ku pirsgirêka Kurdan ya çandî bi dersa Zimanê hilbijatî nayê çareserkirin.”
Hevseroka HDP`ê ya şaxê Mêrdînê diyar ku ji bo formata çareseriyê ya çand û ziman, divê civak hêza xwe bike yek û axaftina xwe wiha bi dawî kir: “Li tevayiya gund, bajar û herêman bi hev re em li hemberî xapandinên dewletê bisekinin. Li ser vî bingehî divê kampanyayên mezin û biencam dest pê bikin. Jiyaneke bi kurdî ji aliyê Kurdan ve bi bawerî bê bejirandin û bijîn. Di her milê civakê û jiyanê de, divê zimanê kurdî bê zindîkirin. Herwiha li her dezgeh û bi her dostê xwe yê li Tirkiyê em bixebitin û zimanê kurdî fermî bikin. Berî her tiştî divê em bi bawer bin ku zimanê kurdî nasnameya me ye û bi zimanê xwe em dikarin azad bijîn”.