Navenda Nûçeyan-Qamişlo
Îro saet 10:00`an bi hezaran şêniyên bajarê Amûdê bi merasimeke girseyî şehîd Îsa Ebdulah ku di oparasyona `Gurzê Gelan` de şehîd bûbû li goristana Şehîd Silêman spartin axê.
Merasimê bi deqeyeke rêzgirtinê li ser giyanê şehîdan dest pê kir. Pişt re li ser navê Meclisa Malbatê Şehîdan Seîd Ferso, axivî û êrişên çeteyên DAIŞ`ê herwiha kiryarên dewleta tirkî ya dagîrker şermezar kirin û wiha got: “Em sersaxiyê ji tevayiya malbatên şehêdan re dixwazin. Hebûna me bi saya xwîna şehîdan e. Ji bo wê divê em li keda wan xwedî derkevin û hêviyên wan yên azadiyê pêk bînin.”
Herwiha bi navê Kongreya Star Remziya Mihemed sersaxî ji malbatên şehîdan re xwest û got, van pakrewanan li dijî çeteyên hov li ber xwe da û şer kirin heta ku gihîştin asta şehadetê. Êrişên çeteyên DAIŞ`ê li ser zindana Sînaa ya Hesekê ne tiştekî piçûk û hindik bû. Çeteyan dixwest bi vê êrişê nasnameya me tine bikin û destkeftiyên heyî têk bibin. Rast e dewleta Tirkan ya dagîrker bi plan êrişan dike, lê ti caran palanên wê bi ser nakevin.
Remziya Mihemed di dawiya axaftina xwede got, em tola şehîdan li erdê nahêlin emê bi rihê têkoşîna şehîdên xwe planên dewleta tirkî têk bibin.
Herwiha Hevserokê Meclisa Leşkerî ya bajarê Amûdê Berxwedan Amûdê diyar kir ku çeteyên DAIŞ`ê ev êriş ne bi tena serê xwe kirin, lê belê bi alîkariya hevalbendên xwe kirin û got, me azadî ne bi hêsanî bi dest xistiye, ji ber wê em ti carî dev ji azadiya xwe bernadin. Divê em ji berdêlên didin netirsin, gelê Rojava ketiye ser rêya azadiyê û ti kes nikare wî ji rêya azadiyê paş de vegerîne.
Pişt re bi sloganên `şehîd namirin, tola we li erdî namine û biji Rêber Apo` şehîd spartin axê û meresim bi dawî bû.
