Emîn Sadûn.
Weke tê dîtin û şopîner jî diyar dikin, ku ji roja Rêveberiya Xweser hatî damezrandin heta roja îro, dewleta tirkî bi hevalbendên xwe ve, ji çeteyên Sûriyê û rêxistinên tundrew û tarîxwaz bi tevayiya hêza xwe şerê vê rêveberiyê dikin. Turkiya Erdoxan ya faşîst cihê xwe yê jeopolîtîk, peywendiyên xwe yên dîplomatîk û têkiliyên xwe yên berjewendîkar di nava wî şerî de bi kar anîne. Herwiha gef û êrîşên leşkerî li ser bakur û rojhilatê Sûriyê û rêveberiyê nesekinandine. Jixwe êrişên leşkerî û siyasî yên dewleta tirk ya faşîst, bi piştgiriya rejima Sûriyê, Rûsya û Emerîka li gorî rêkeftinên veşartî, beşeke mezin ji xaka Sûriyê û deverên kurdî dagîr kirine. Turkiyê tevayiya teknîkên şer yên kevin û nû û her rengê şerê germ û yê sar li hemberî Rêveberiya Xweser bi kar anîne û hê jî berdewam e.
Şerê taybet cihekî mezin û bergeheke berfereh di nava wan şerên domdar de girtiye û bi wî şerê qirêj û gemar dixwaze derûniya xelkên herêmê bihejîne û civakê ji hev bêxe. Herwiha bêbaweriyê lewaz bike, hêviyan di malzarokan de bifetisîne û deriyê parçebûn û pevçûnê di civakê de veke. Lê heta ku van armancan bi demê re pêk bîne, sînorên şer li piştê hiştin vekirî û carna bi xwe û carna piştgirî da hêzên çete û carna jê destek da rêxistinên terorist yên mîna DAIŞ`ê. Armana wê ya sereke bicînebûna aramiyê li herêmên Rêveberiya Xweser e.
Çawa ku tê anîn li seranserê cîhanê dema deverek ne aram be pêşketin li wir çênabin û projeyên mezin pêk nayên.
Ji ber dewleta tirkî vê baş dizane naxwaze agirê şer li ser bakur û rojhilatê Sûriyê rawestîne, li dijî Rêveberiyê plansaziyan dirêse. Armanca wê ya dawî ji vî şerî lawazkirin, bêhêzkirin û jikarxistina rêveberiyê ye û domahiyê roxandin û tinekirina wê ye. Rastiya naveroka vî şerî ew e ku gelê herêmê bi giştî û gelê Kurd bi taybetî ji mafê xwe yê rewa were bêparkirin û hebûna wî li ser xaka wî ya dîrokî bikeve metirsî û nemanê. Divê em bizanin ku ev rêveberî bi xwîn, ked û xwêdanê hatiye avakirin û bi berdêlên mezin hatiye ragihandin. Ji ber wê destkeftiyeke neteweyî û niştimanperwerî ye û dive gelê me bi tevayiya hêza xwe vê destkeftiya dîrokî biparêze û lê xwedî derkeve. Lewra xwedîderketina vê erkekê mirovî, neteweyî, welatparêzî û exlaqî ye.
