Serbest Etê/Hesekê
HPC`ê bi Kurd û Erebên xwe li bajarê Hesekê teqez kirin ku wê heta dawiy; li ser xeta şehîdan bin, parastina xwe ya rewa pêk bînin û rê nedin serkeftina êriş û planên dijimin.
Hevgirtina Kurd û Ereban êrişa DAIŞ`ê şkand
20ê Çileyê, çeteyên DAIŞ`ê êrişî girtîgeha Xiwêran ya Hesekê kirin. Bi vê êrişê xwestin çeteyên xwe yên girtî birevînin û li herêma bakur û rojhilatê Sûriyê tevlîheviyê derxin. Ev êriş wek komployeke mezin li ser Rêveberiya Xweser û gelên herêmê hat niraxandin. Lê bi saya 121 şehîdên Kurd û Ereb ev êriş hat şkandin. Bi dewamkirina êriş û komployên li ser gelan, Hêzên Parastina Civakê (HPC) bi Kurd û Erebên bajêr vîna azad ya civakê nîşan dan, kolan û taxên xwe ji her êrişê diparêzin.
Pêşengiya jinê di parastina rewa de
Endama Hêzên Parastina Civakê ya jinê (HPC) ya taxa Tela`a ya bajarê Hesekê Sureya Dawid, ku li taxa xwe tevî du jinan erkê xweparastinê pêk tîin ji me re axivî û got, ji destpêka şoreşê ve me hêza xwe ya civakê bi rêxistin kiriye. Ji 20`ê meha borî ve jî li hemberî şaneyên çeteyên DAIŞ`ê di serî de jin, pîr, kal, mêr û ciwanên bajêr, ji bo xweparastinê daketin qadan. Bila her kes bizane, şervanên QSD`ê ne tenê ne, gel li kêleka wan e; ew parazavên me ne û em jî xwediyên wan in.
Ji qadên berxwedanê yên Hesekê berxwedana Îmralî hat silavkirin
Sureya teqez kir ku wê wek jin ti carî rê nedin çeteyên DAIŞ`ê û dewleta tirkî ya dagîrker ku di êriş û planên xwe de bi ser bikeve û bi vê peyamê axaftina xwe qedand: “Divê civak hişyartir be. Herwisa em bang li tevayiya gelê xwe dikin ku her kes di vê berxwedanê de rola xwe bilîze. Em ji qadên berxwedanê yên Hesekê silavan ji bo Rêber Apo dişînin û berxwedana li Îmralî pîroz dikin, herwiha em hêza xwe ji wî digirin.
‘Emê ji bo parstinê têkoşîna xwe bênavber bidomînin’ 
Herwiha Endamê HPC`ê yê taxa Ezîziyê Mesûd EL-Mixilf ku bixwe Ereb e, ji me re axivî û ev agahî da: “HPC bi xebata xwe teqez kir ku hêza bingehî ya civakê ye û di vê rewşa dawî de roleke sereke dilîze. Bi hevkariya saziyên leşkerî û şervanên xwe, me aramiya taxên xwe parast. Em bi hêzên ewlekariyê re hevkar bûn û kesên biguman û bixeter radestî saziyên têkildar kirin. Herwiha me koçberên ji ber DAIŞ`ê revîn ji taxa Xiwêran û Zihûr himbêz kirin û li mal û ciyên parastî bi cî kirin. Wek HPC em soz didin şervan û gelên xwe ku emê li ser piyan bimînin; destkeftiyên xwe biparêzin û têkoşîna xwe bidomînin.”
