Welatiyê bi navê Hemo Şêx Hemo li taxa Şêxmeqsûd hewl dide bi çandina sebzeyan di cihekî piçûk de li kêleka mala xwe, debara jiyana xwe bike, da ku bandora dorpêça hikumeta Şamê ya li ser taxê sivik bike.
Hikumeta Şamê bi dorpêça li ser taxên Şêxmeqsûd û Eşrefiyê yên Helebê hewl dide rê nede ku madeyên bingehîn ên wekî ard û sotemenî bikevin taxan.
Şêniyên taxê jî li nêzî malên xwe an jî li ser banê xaniyan çandiniyê dikin.
Bi sedan şêniyên taxê ji bo dabînkirina pêdiviyên malê, ji ber dorpêça ku hikumetê ferz kiriye, li malên xwe sebzeyan diçînin. Welatiyê bi navê Hemo Şêx Hemo jî li ser banê mala xwe li Kolana Zihûr hin cure sebze çandine.
‘EMÊ LI HEMBERÎ DORPÊÇÊ LI BER XWE DIDIN’
Hemo wiha dibêje: “Em ji ber dorpêçê gelek zehmetiyan dikişînin, ji ber wê jî em li malên xwe sebzeyan diçînin da ku pêdiviyên xwe yên malê dabîn bikin.”
Hemo destnîşan kir ku sebze pir buha ne, ji ber şert û mercên zehmet ew nikarin sebzeyan bikirin, lê ruxmî wê jî ew li hember dorpêçê li ber xwe bidin. Hemo anî ziman ku ew ji bo debara malbata xwe sebzeyan diçîne û got: “Her roj em ji van sebzeyan dixwin.”
Hemo di dawiya axaftina xwe de destnîşan kir ku ew ê li hemberî dorpêça hikumeta Şamê bisekinin û bang li rêxistinên mafên mirovan û navneteweyî kir ku zextê lê bikin da ku dorpêça li ser taxên Şêxmeqsûd û Eşrefiyê rawestîne.
ANH
