Navenda nûçeyan-Qamişlo
Şêniyên Qamişlo 12 şervanên xwe ku di oprasyona dijî çeteyên DAÎŞ’ê li girtîgeha Sînaa ya li Hesekê şehîd bûn, li Goristana Şehîd Delîl Saroxan ya bajarê Qamişlo oxir kirin.
Îro bi hezaran şêniyên bajarê Qamişlo û gundewarên wê bi merasîmeke heybet bi `tilîlî û silogana şehîd namirin, bijî Rêber Apo` 12 şervanên xwe yên di oprasyona dijî çeteyên DAÎŞ’ê de li girtîgeha Sînaa ya li Hesekê şehîd bûn, li goristana şehîdan sipartin axê. Herwiha endama HPG şehîd Sozdar Cûdî ya di êrişên dewleta tirk ya dagîrker li Mardînê şehîd ketî hat bîranîn.
Di merasîma de hevserokê Saziya Malbatên Şehîdan ya bajarê Qamişlo Masûm Hesen wiha axivî: “Destpêkê ez sersaxiyê ji hemû malbatên şehîdan re dixwazim û bejina xwe bi hurmet, ditewînim. Ez tim vê gotinê dibêjim, hebûna me bi saya xweîna şehîda ye. Ji bo wê divê em gel li keda wan xwedî derkevin û hêviyên wan yê azadiyê pêk bînin.”
Masûm Hesen axaftina xwe wiha bi dawî kir: “Dewleta tirk ya dagîrker bi êrişên xwe yê hov, dixwaze di nav pêkhatiyên herêmê tevlîheviyê derxîne, lê şervanên me bi berxwedana xwe van planan têk dibin.”
Hevseroka Tevgera Civaka Demokratîk (Tev Dem) Zelal Ceger jî wiha axivî: “Careka din dewleta tirkî ya dagîrker bi armanca tolrakirina çeteyên xwe yên DAÎŞ’ê xwest bi van êrişên xwe dawî gelê Kurd qir bike. Lê em dibêjin, ti nikarî gelê me tine bike, ti nikarî vîna gelê me bişkîne. Vaye îro xort û keçên me di çeperên şer de ji bo hebûna gelê xwe canê xwe feda dikin. Ji bo em li şehîdên azadiyê xwedî derkevin, pêwîstî bi tekoşîn û berxwdanê heye.”
Hevseroka Tevgera Civaka Demokratîk (Tev Dem) Zelal Ceger de sersaxî ji tevayîya malbatên şehîda re xwest.
Herwiha peyama malbatên şehîdan jî ewe ku wî tola şehîdan li erdê nehêlin. Malbata gotin Emê bi rihê têkoşîna şehîdên xwe planên dewleta tirkî vala derxînin.
