27 Çile 2022, Pencşem – 12:45:00
NAVENDA NÛÇEYAN
Koordînasyona Kongra Star a Ewropayê serkeftina Hêzên Ewlekariya Hundirîn bi piştgiriya QSD`ê pîroz kir û got, divê civaka navneteweyî û hêzên navneteweyî berpirsyariyên xwe bînin cih û eniya têkoşînê li dijî dijminê mirovahiyê bikin yek
Koordînasyona Kongra Star a Ewropayê daxuyaniyek da û serkeftina Hêzên Ewlekariya Hundirîn û Hêzên Sûriya Demokratîk (QSD) li hember çeteyên DAIŞ`ê pîroz kir.
Duh QSD`ê ragihandibû ku plana DAIŞ`ê û hevkarên wê ya li dijî girtîgeha Sînaa têk çûye û piştî şerên 7 rojan, girtîgeh bi giştî hat kontrolkirin. Herwiha da zanin ku operasyona li dijî DAIŞ’ê ya paqişkirina bajar berdewam e.
Kongra Star di daxuyaniya xwe de got, Li Bakur û Rojhilatê Sûriyê rojeke dîrokî bû ku bi tîpên zêrîn hat nivîsandin. Serkeftineke din li Hesekê li serkeftinên QSD, YPJ û Hêzên Ewlekariya Hundirîn ên li hember dijminên mirovahiyê DAIŞ’ê ku dewleta Tirk desteka wê dike, zêde bû. Wan bi vê êrişên DAIŞ’ê xwest di salvegera dagirkirina Efrînê de xewnên xwe yên mêtingeriyê di dagirkirina herêmên ewle de pêk bînin, lê di salvegera rizgarkirina Kobanê de ev xwewna wa dîsa têk çû.
Kongra Star da xuyakirin ku êrişa li ser girtîgeha Sînaa ji hewldanên dewleta Tirk ji bo vejandina DAIŞ`ê bû, lê bi saya berxwedana QSD, YPJ û Hêzên Ewlekariya Hundirîn ew êriş û armanca dewleta dagirker têk çû.
Koordînasyona Kongra Star teqez kir ku bi yekitiya gelan hemû komplo wê têk biçin û serkfetina QSD û Hêzên Ewlekariya Hundirîn li gel salvegera 7`an a rizgarkirina Kobanê pîroz kir û şehîdên berxwedanê bi rêzdarî silav kir.
Di dawiya daxuyaniyê de wiha hate gotin: “Bê guman berpirsyariya tunekirina DAIŞ`ê ne tenê dikeve ser milê gelê herêmê, divê civaka navneteweyî û hêzên navneteweyî berpirsyariyên xwe bînin cih û eniya têkoşînê li dijî dijminê mirovahiyê bikin yek.”
