Navenda Nûçeyan/Qamişlo
Desteya Hundir ya Rêveberiya Xweser ya bakur û rojhilatê Sûriyê qedexeya 7 rojan ya giştî li ser kantona Hesekê û ya qismî li herêmên din yên rêveberiyê ragihand.
FacebookTwitterWhatsAppTelegram
Rêveberiya Xweser ya bakur û rojhilatê Sûriyê bi daxuyanyekê da zanîn ku ji ber êriş û tevgera DAIŞ’ê ji bo parastina ewlehiya herêmê qedexeya giştî li ser kantona Hesekê û ya qismî li ser herêmên din ên rêveberiyê radighîne.
Daxuyanî wiha ye:
“Dewleta Tirk ji bo pêkanîna armancên xwe yên têkbirina ewlehî û istîqrara Rêveberiya Xweser a Bakur û Rojhilatê Sûriyê bi bin ket, ji ber vê yekê careke din berê xwe da DAIŞ`ê da ku armancên xwe yên qirêj ên têkbirina Rêveberiya Xweser û destkeftiyên wê, pêk bîne.
Lê berxwedana Hêzên Sûriya Demokratîk (QSD) û Hêzên Ewlekariya Hundirîn ya lehengane, ev êrişa li dijî gelê Bakur û Rojhilatê Sûriyê û pêkhateyên wê têk bir û armanca dewleta Tirk a dagirker vala derxist. Dewleta Tirk bi vê hewldana xwe careke din îsbat kir ku ew mastermîndê (aqlê birêvebirinê) yê DAIŞ`ê ye ku ew xeteriyeke mezin li ser ewlehiya herêmê û cîhanê çêdike.
Em weke Desteya Hundirîn a Rêveberiya Xweser a Bakur û Rojhilatê Sûriyê qedexeya giştî ya hundirîn û derve a heya hefteyekê li ser bajarê Hesekê radigihînin. Qedexe ji 24`ê Çile dest pê dike heya 31`ê Çile. Qedexe giştî ye, tenê saziyên xizmetguzariyê yên wekî (Firne, aş, navendên tenduristiyê, sotemenî û şaredarî) ku xwezaya karên wan cuda ye, wê bixebitin. Her wiha li sazî û bajarên din jî qedexeya beşî(qismî) ye û ji saet 06:00`ê êvarê dest pê dike heya 06:00`ê sibehê.
Di dema qedexeyê de tevgera çûn û hatina di navbera bajaran de jî qedexe ye. Ji bo parastina ewlehiyê li Bakur û Rojhilatê Sûriyê em ji gelê xwe dixwazin ku papendî van perspektîfan bin, da ku hêzên me karibin bi erka xwe ya parastina ewlehî û istîqrara herêmê rabin.
Em ji hêzên xwe re serkeftina domdar dixwazin. ”
