Jiyan Ebas-Qamişlo –
Bi hezeran şêniyên bajar û bajarokên Qamişlo, ji bo şermezarkirina êrişên dewleta tirkî ya faşîst yên ser bakur û rojhilatê Sûriyê daketin qadan û bang li Netewên Yekbûyî kirin ku ‘Qada ezmanî ji bo êrîşên tirkan bigire’.
Êrîşên dewleta tirkî ya qirker yên li hember bakur û rojhilatê Sûrî bê navber dawam dikin. Herî dawî duh bi balafirên xwe yên şer, seyareyekê sivîlan hedef girt û di encamê de jî 3 sivîl şehid bûn. Li hembar van êrişên hov yên dewleta dagirker, îro saet 10’an li Qamişlo, meşekê girseyî li taxa Kornîş dest pê kir û heya li ber deriyê rêxistina Netewên Yekbûyî dewam kir.
Piştre Hevserokê Meclisa Malbatên Şehîdan ya bajarê Qamişlo Mehsûm Hesen axivî û wiha got: “êrişên dewleta tirkî ya dagîrker yên ser herêmên bakur û rojhilatê Sûriyê û başûrê Kurdistanê hêza gelê Kurd naşikîne û tu caran nikaribe vîn û îradeya gelê me ya bi hezarê salan bişkîne . Êrişên ser başûrê Kurdistanê, tev bi çete û hevkarên Tirkiyê tên kirin. Tiştên ji aliyê dewleta tirkî ve li bakur û rojhilatê Sûriyê dibin, li ber cavê tevayiya cîhanê û rêxistinên Netewî tên kirin. Qaşo dibêjin em parêzvanên mafê mirovan in û behsa aştî û demokrasiyê dikin. Em jî ji van kesan re dibêjin ka aştî, ka demokrasî. Mixabin cîhan tev li hember êrişên dagîrkeriya li ser Kurdan bêdeng e. Balafirên Tirkiyê rojane xaka Kurdistanê bombebaran dikin. Ka wijdan û mirovayî, ka Neteweyên Yekbûyî.”
Mehsûm Hesen axaftina xwe wiha qedand: “dewleta Tirkan xwe li ser qirkirina gelên Rojhilata Navî, ava dike. Ji ber wê divê hikûmeta başûrê Kurdistanê û teybet jî PDK’e ji tevger û xiyaneta ku li gelê xwe dikin, şerm bikin. PDK û dewleta dagirker wê nikaribin siyaseta qirkirinê bidomînin. Emê li kêleka şervanên xwe bin û rojane li qada bin, heta em vê siyasetê pûç bikin û dagîrkeriyê rakin. Em dibêjin ji xiyanetê re na, bimire dagîrkerî.”
Bi durişmeya ji xiyanetê re na, bimre dagirkerî meş bi dawî bû.
