Navenda Nûşeyan-Qamişlo
Destar yek ji amûrên malan yên kevnar e. Dîroka wî di xwe digihîne berî bi hezarê salan. Gelan pê genim dihêra. Li her gundî û li her malê destar amûrekî pir girîng bû.
DESTAR JI ÇI ÇÊBÛYE?
Destar amûrekî ji kevir çêdibe. Dû perçeyên kevir mezin û gulover in,lê yek ji yê din stûrtir e. Kevirê stûr jê re dibjin bingeh. Di kevirê li ser diger re de cihekî piçûk tê kolan da cihê dar çêkin û kesê ku destar bi kar bîne bi hêsanî kevir bigerîne. Kevirê bingeh li erdê ye nayê gerandin. Kevirê din datînin ser û digerînin. Dema tê gerandin genim dihêre. Hem dibe savar hem ard. Herwiha berî ku dest bi hêrana genim were kirin perçeyek qumaş li binî tê raxistin da ku genimê hêrayî bikeve serê.
ZEHMET E LÊ BI TAM E
Bêguman destar li her gundî hebû lê jimara wan ne pir bû. Herî zêde 4 destar li gundekî hebûn. Ji ber ku destar giran e, demsala havînê jinên gund li hev kom dibûn, alîkariya hev dikirin û destar bi kar dianîn. Her roj genimê malekê dihêran. Di ber hêranê re jî jinan stiran digotin û suhbet dikirin. Berî ku jin genim bihêrin destpêkê dikelînin, ziwa dikin, paqij dikin û pişt re dihêrin. Destar amûrekî xwezayî ye û tiştê ku pê tê hêran weke genim, nîsk û nok xwezayîbûnê winda nakin. Herî zêde jin destar bi kar tînin. Eger jinan bixwesta ard çêkin hin genim berdidan çalika destar û hêdî hêdî digerandin. Eger bixwestanan savar çêkin gelek genim berdidan destar û bi lez digerandin. Savarê ku ji destar derdikeve bi bîn û tama xwe keda jinan nîşan dide. Lê di dema me ya niha de ji ber pêşketina amûrên teknîkê, destar hatiye jibîrkirin. Êdî xelkên me hazir dikirin. Bi kurtayî mirov dikare bêje amûr û karê berê li gorî çanda gelan ya xûlikkar û kominal bû. Karê ku civakê bi hev re dikir civakbûn xurt û bihêz dikir.