Havva Aksal ya 46 salî debara xwe bi dikana sebze û mêwe dike. Havvaya ku di heman demê de beşa Îlahiyatê ya Zanîngehê dixwîne wiha dibêje: “Divê jin xwe ji rolên hişmendiya civaka serdest ya mêr rizgar bike û di riya xwe de bimeşe. Bila jin li pey xeyalên xwe herin.”
Jinên ku pêşengiya jiyanê dikin di her qada jiyanê de rengên xwe nîşan didin. Havva Aksal (46) ya ku li Pîrana Amedê dijî û debara xwe bi dikana sebze û mêwe dike jî di qada aboriyê de rengê xwe nîşan dide. Havvaya ku 5 sal in vî karî dike dibêje, divê jin bikare bêje ez dikarim bikim û ez dikim.
‘Êdî karekî jin nikaribe bike nîne’
Havvayê di destpêka axaftina xwe de bal kişand ser karê xwe û wiha axivî: “Min û amojina xwe dixwest di karekî de bixebitin û me ev cih dît. Me wisa dest pê kir. Destpêkê me ji bazirganiyê fêm nedikir. Lewra em her tim di mal de bûn. Lê bi demê re êdî me jê fêm kir û me xwe pêş xist. Êdî karekî ku jin nikaribe bike hema hema nîne. Destpêkê li dijî karê min nêrîneke baş tinebû. Lewra karê dikana sebze û mêwe her tim bi çavekî karê mêran e hatiye dîtin. Lê bi demê re êdî çavên wan jî hînî karê min bûn.”
‘Ji aliyê jinan ve gelek gavên girîng hatine avêtin’
Havvayê diyar kir ku her tim di nava xebat û tevgerê de bûye û wiha pê de çû: “Gava min ev kar nedikir, dîsa di hundirê mala xwe de min salçe çêdikir û difirot, sebze û fêkî kom dikir û difirot yan jî hişk dikir û firotina wan dikir. Dîsa ji berê de diya min salçe çêdikir û difirot şîr, pênîr difirot. Yan jî min berhemên baxçe kom dikirin û bazara wan dikir. Kedeke mezin me dida. Îro beramberî heqdestê me li gorî demên ewilî baştir xuya dike. Ji bo aboriya serbixwe ji aliyê jinan ve gelek gavên girîng hatine avêtin.
‘Bawerî û cesareta me bi xwe heye’
Havvayê li ser zehmetiyên karê xwe jî sekinî û wiha got:”Em hê jî di karên xwe de hin zehmetiyan dikşînin. Wekî girtina zebzeyan yan jî di karên teknîkî de zehmetî çêdibin. Lê bawerî û cesareta me bi xwe heye ku emê xwe pêş bixin. Gava jin ji bo destpêkê gavê biavêje dibîne ka çiqas rê derbas dike. Divê jin bikare bêje ez dikarim bikim û ez dikim. Xebata jinê bi rengê jinê xweştir e.”
‘Bila jin li pey xeyalên xwe herin’
Havvayê di dawiya axaftina xwe de da zanîn wê ti carî nexwestiye di malê de tenê bimîne û wiha got: “Min ti carî nexwest di hundirê malê de tenê rûnim, firaq û cilan bişûm. Divê her tim di vê jiyanê de miro cihê xwe bigire û li pey jiyaneke biwate be. Ez 46 salî me lê xwendevan im. Dibe ku hinek dereng mabim lê min daxwaziyeke xwe pêk anî. Li gorî min divê hemû jin cesareta xwe bigirin û li pey daxwazî û xeyalên xwe herin. Bi taybetî jî di aliye xwendin û aboriya serbixwe de divê jin her tim pêşengiyê bikin.”
JINNEWS