Bi beşdarbûna bi sedan şêniyên Tebqa cenazeyê endamê Hêzên Ewlekariya Hundir Ehmed Xedban bi merasimekê hat veşartin.
Bi sedan şêniyên Tebqa di gel nûnerên Rêveberiya Sivîl, meclisên leşkerî û partiyên siyasî cenazeyê endamê Hêzên Ewlekariya Hundir Ehmed Xedban, li goristana Şehîdan spartin axê. Ehmed Xedban 11`ê vê mehê li ser erkê xwe şehîd bûbû.
Merasim li goristana Şehîdên Tebqa bi rêzgirtinê dest pê kir. Di merasimê de bi navê malbatên şehîdan endamê Rêveberiya Meclisa Malbatên Şehîdan Ebdulhekîm El-Mihemed axivî û sersaxî ji malbata şehîd re xwest.
Bi navê Hêzên Ewlekariya Hundir hevseroka Komîteya Hundir ya Tebqa Yesrib El-Hesûn jî di axaftina xwe de soz da dayîkên şehîdan ku şopdarên riya zarokên wan yên şehîd bin, parastina herêmê bidomînin û nehêlin aramiya wê têk biçe.
Bi navê malbata şehîd Ehmed Xedban bavê şehîd, Heysem Xedban jî di axaftina xwe dewiha got. “Ji bo parastina erd û gelên xwe me bi hezaran şehîd dan. Îro jî ji bo ku em bi xêr û di nava aştiyê de bijîn min kezeba xwe da. Çawa ku me soz daye leheng û şehîdîn xwe emê li ser soza xwe bimînin.”
Di dawiya merasimê de şehîd di nava sloganan de hat veşartin.
ANHA
