LEMÇLEMÇ
Silav ji we re, ez bawer dikim we jî îsal zebeşek xweş nexwariye, malnemîrata êdî ne tam e ne reng e, ne jî dendik e, ji goştê mirîşkê yê hatî qerisandin û pişt re derdixin têxin nava avê de ji bo bihele nermtir bûne zebeşên îsal. Vêca ser vê re jî Çîniyan qalib ji bo zebeşan çêkirine û êdî zebeşên sêkoşe, çarkoşe, têrkoşe, kuşkuşe çêdikin. Piştî Amediyan û Osman Sebrî ev bihîst, hem di meclisê de hem jî li kolanên Amed û li ser birca wê qiyameta mirovan rabû. Kepengên xwe anîn xwarê û ketin kolanan û Çîn protesto kirin. Bi durişmên bila Çîn xwe ji qirêjiya koronayê xilas bike, xêr e xwe li zebeşan dide. Zebeş e dendikreş e, em nadin te tu Hebeş e. Çawa dibe Çînî xiyaneteke wisa li Amediyan bikin. Qehwecî, cigercî, beqlewacî, Denîz Nakî, Beytocan, Kemalê Amed rabûn ser piyan, gel kom kirin û daxuyaniyek dan. Rêveberên Amed sporê jî daxuyaniyek dan û wiha gotin: “Ma emê êdî çawan qeleciyên xwe fêrî girtina topê bikin, zebeş çarkoşe be yan sêkoşe be wê qelecî çawa bikarin bigirin, ev tiştekî ne rast e û bi zebeşan nelîzin. Li aliyê din qeleciyên cîhanê yên weke Buffun, Navas, Kamenî, Muslera li ser torên medya civakî twîtek avêtin û gotin, bê zebeşên Amedê em ne tiştek bûn, em bi saya wan zebeşan niha di asta herî jor de ne û em Çînê şermezar dikin. Bila pêşî li mezinbûna qeleciyên nû negire. Li aliyê din ji aliyê saziyên hundir, saziyên dikandaran, karkerên zebeşan bi hev re civînek li dar xistin. Di civîna xwe de hinek biryarên tund li ser Çînê ragihandin. Hinek ji wan biryaran jî evin;
Wê navên hemû dikanên ku marka Çînê li ser e, li kêleka wê wêneyê zebeşê Amedê daleqînin. Heçiyê tîştekê ji wan bikire li kêleka wê divê zebeşekê jî bikire.
Wê meşek were lidarxistin û heta qada Newrozê bimeşin, ev meşa wan jî wê ji aliyê Stêrk tv, Medya Haber, BBC, CNN Turk ve zindî were weşandin.
Wê ev bûyer li meclisa Turkiyê were nîqaşkirin û berdevkê konsolosxaneya Çînê wê her roj zebeşek yê Amedê bikire û li xebatkarên xwe belav bike.
Wê hunermendên me yên weke, Kemalê Amed, Koma Gel, Evdilmelîk, Serap Sonmez û Chopy konserên xwe yên li Çînê betal bikin û ji bo zebeşên Amedê qlîbekê bi hev re çêkin.
Wê Meral Şîmşek romanek û Azad Zal pirtûkekê li ser dîroka zebeşên Amedê binivîsin, çap bikin, wergerînin Çînî û di sûkên Çînê de bifiroşin.
Amedî wê îhaleyên xwe hemûyan bidin betalkirin.
Wê komeke berfireh were amadekirin û herin Çînê, semîneran pêşkêş bikin û sudên zebeşên Amedê ji bo koronayê çi ne were ragihandin.
Dikandarên Amedê wê raporekê pêşkêşî Yekîtiya Ewropayê bikin ku tê de dibêje divê Çîn ji Yekîtiya Ewropayê derkeve.
Şeyhmus Dîken, Cemal Yilmaz li beramberî Çîniyan şereke teknolojiyê bikin, wê erebeyên girover çekin û tekerlekê wan jî têrkoşe çêkin.
Di van biryaran de jî pir cidî nêz dibin. Helbestvanek di mitînga li dijî zebeşan de ev helbesta ha xwend, me got em wê jî bi we re parve bikin, kerem bikin bixwin na na bixwînin, zebeşan bixwin, lê ne yên çîniyan.
Zebeş e dendikreş e
Tama wî bi zilq û zibl ê kevokan dimeşe
De were bibîne çiqas xweş e
Pê dibî weke serxweşe
Ne Ruştu, ne Muslera
Va ye dipije qelecî Abdullah
Zebeşê me li ber devê kerê reş e
Got min divê welatê xweşe
Te xêr e dikî goşegoşe
Emê li we bikin roja reşe
Rojnameya Rojev
