Faruk Sakik
Serokê HSK’ê Mihemed Hacî Mehmûd di konferansekê de, di axaftina xwe de digot, ev bû 25 sal li wê herêma Qendîl dijmin nîne, hêza Be´es nîne. Ji bo çi pêşmerge niha here wê derê û xwîna birayên xwe birijîne? Hewce nake. Jixwe PKK, PDK û YNK’ê li hev kirin û biryar dan ku gerîla li Qendîlê bi cih bibe.”
Ev bersiva ku gerîla çima li Qendîlê ye. Lê gelek sedem hene ka gerîla çima hat van deveran û îro çima li van deveran li dijî dijminê Kurdan şer dike.
Na… emê mînaka, sala 1877’an dema şerê Rûs û Osmaniyan, hêzên Rûs hewl dan êrişî Kurdên herêma Serhedê bikin, Şêx Ubeydullah Nehrî bi hawara wan ve çû nedin.
Dema êrişa Îran û Ingilîzan, Şêx Mehmûd ji bajarê Silêmaniyê derbasî rojhilatê Kurdistanê bû û Kurdên vê beşa welat, ti carî Şêx Mehmûdê Berzencî ji bo xwe weke bar nedît û jê re negotin çi karê te li herêma me heye. Na…Emê vê mînakê jî nedin.
Li hemberî êrişên Îran û dewleta tirkî, Simko berê xwe da bakurê Kurdistanê û ji aliyê gelê vê beşê ve hat himbêzkirin. Yanî Kurdên Bakur ji bo têkbirina tevgera Simkoyê Şikakî nebûn hevkarên Tirkiye û Îranê. Belê…Em vê mînakê bi bîra PDK’ê bixin.
Li dadgeha Îranê, dema pirsa çi karê Mele Mistefa Barzanî li vir heye ji Qazî Muhemed hat kirin ev bersiv da: “Kurdistan, mala her Kurdî ye. Em baş dizanin, bav û bapîrên we, ji we re bersiva Qazî gotibûn, lê we ev bersiv ji bo berjewendiyên xwe yên malbatî ji bîr kiribû.
Dîsa Kurdên bi pêşengiya Mele Mistefa Barzanî dema li ber rêjima Iraqê rabû, Bakur, Rojava û Rojhilat bûn wargehên pêşmergeyan. Û wê demê ti hêza Rojhilat, bi gotina “hebûna te zererê dide pêwendiyên me û Iraqê” zor li Mele Mistefa nekirin.
We dît PDK…? Ti kes weke we tev negeriyaye.
PKK ne tevgereke bakurî tenê ye. Rast e ji Bakur dest pê kir, lê bi demê re bû tevgereke kurdistanî. Ji her devera Kurdistanê Kurd hatin di nava vê tevgerê de cih girtin. Bûn gerîla û li derveyî herêma xwe jî şer kirin. Ji başûr hatin li Bakur şehîd bûn. Hin kes jî hatin li Başûr bi cih bûn. Li herêma Qendil, Avaşîn, Xakurk, Zap û Metîna bargehên xwe ava kirin.
Û em derbasî bersiva çima gerîla li vê heremê ye, bibin.
Emê rastiya ku PKK mafdar e li her devera Kurdistanê bargehên xwe ava bike, PKK ji bo azadiya Kurdistanê têdikoşe, daynin aliyekî. Lê rastiyeke din heye. Ev herêm ne xaka bavê ti kesî ya tapokirî ye. Ev xak, xaka gelê Kurd e. Ev xak, xaka Diyar Xerîb, Vîyan Soran û bi hezaran gerîlayên ji Başûr e jî. Ev xak, xaka bi hezaran şehîdên ji vê heremê ne jî.
Baş e…yên ji parçeyên din ji vê heremê vekişiyan, hûnê ji gerîlayên Başûr re statûyeke çawa bibînin? Hûn dibêjin bila her kes li herêma xwe têbikoşe. Ahaa.. Hevalê Diyar Xerîb jî dixwazin li herêma xwe şer bikin. Hûn çima dibin asteng?
Hûn van baş dizanin, lê dijminê Kurdan van rastiyên dîrokî ku me li jorê mînak dan û rastiya PKK’ê ji we xwestin ku hûn jî bîr kin. Bi DNA’yê we lîstin. Yan jî ku wisa nebûya anha peşmerge di dest de çek di tabûra Diyar Xerîb de li dijî dagîrkeriya dewketa tirkî şer dikir. Rêveberiya hikûmeta Başûr jî wê serî li Neteweyên Yekbûyî bida bigota “çi karê artêşa dewleta tirkî li ser xaka me heye.”
Ji bo vê yekê ti kes nikare bibêje, PKK û gerîla çima li herêma Başûr in.