Ahme Aktaş
Temenê desthilatiya AKP’ê, ketiye sala 19’an. Amûrê sereke yê pênasa xwe îslamiyet nîşan dida. Piştî 2015’a, desthilatiya wê kete xeterê, MHP kişand cem xwe û bi îslamiyetê ve tirkîtî jî pê leziqand.
Weke tê zanîn di xwezaya hemû desthilatiyên dewletan de amûrê zordestî, kotekî heye û di encamaê de vana tirsê diafirînin.
Ji xwe AKP’ê, bi navê mexdûriyetê ketibû rê. Lê dît ku êdî rûyê xwe yê reş nikare veşêrê, gel pêdihese, darê zorê derxist pêş û bi hevalbendiya MHP’ê ya ji aliyê şîddetê-tirsê ve xwedî serpêhatiyên mezine, êdî ji vê siyaseta tirsê re sînor bi tevayî vekir.
Di qonaxa nuha ya desthilatiya AKP-MHP’ê de, mirov dikare bêje, dawî li sermaya wan a îslamiyetê û tirkîtiyê hatiye, lewma bi tevayî hêvî û çarenivisa xwe bi darê zorê-şiddetê ve girêdane.
Ew pevçûna navbêna mafyayên wan û dijwarbûna nakokî û aloziyên navbêna wan jî, encamê vê naçarî û lawaziya wan e. Êdî li dijî herkesên ku mîna wan nemeşin, amûrê tirsê didin xebitandin.
Ew gotina Sedat Peker a digot, “min ji we(AKP-MHP’ê) re, avhewa/atmosfera tirsê diafirand, we jî li ser vê zemîne desthilatiya xwe birêve dibir” û hwd.balkêşe!
Em, wan çalakiyên komkujiyên di pêvajoya hilbijartinên 7’ê Hezîrana 2015’an û 1 Mijdara 2015’an de pêkhatin bînin bîra xwe. Ev gotinên ku nuha S.Peker dibêje, encamê zihniyeta R.Edrogan e ku wî jî, di wê dema hilbijartinan de digot; “jin be, zarok be(ferq nake divê were kuştin)”, “eger tu hizir neke Kurd nîne”! Di dema dawî de rêveberên AKP-MHP’ê, qirkirina kurdan xistine rojeva xwe û dibêjin “heta yek kurd (ê ku azadî û xweseriyê dixwazin) hebe, em dest ji qirkirinê bernadin”!
Di wê pêvajoya hilbijartinan de, li ser wan komkujiyên Amedê, Pirsûsê û Gar a Ankarayê, R.Erdogan û Davudoğlu digot in; “dengên me zêdê bûn e”!
Jiber ku her ji despêkê ve, xwedî heman zihniyeta mêtingerî, dagirkerî, kedxwarî, talankerî, wêrankerî û qirkerî ne, lewma nuha ev stratejiya xwe ya zordariyê, kotekîyê û şidetê ya afirandina geştûhewa/atmosfera TIRSÊ, derxistine radeya herî bilind. Ew gotina wan a digotin “ji bo me ev mijar a ‘BEKA”yê ye-man û nemanê ye”, rast e. Ji ber ku êdî di destê wan de, ji bilî bikaranîna amûrê TIRSÊ ti sermaya wan nema ye.
Ji ber ku li derve ev karên wan ên gemar, rûyên wan ê reş hate aşkerekirin, bazara wan a bikaranîna çeteyan, alavên hişbirinê û bi giştî bazirganiya reş nema ye an jî pir kêm bûye, lewma êdî hemû hêza xwe ya zulmê, zivîrandine ser serê gelê Kurdistanê.
Ev êrîşkarîyên wan ên bi vê giraniya mezin û berfireh ên li ser Başûr û Rojava, encamê vê tengavî û lawaziya wan a vê rewşa dawî ye. Jiber ku ketina qonaxa man-nemanê, êdî ne zagonên xwe û ne jî yên navdewletî nasdikin. Ji tirsa ku desthilatî ji dest diçe, pir caran bê hiş û bê pîvan, erîş dikin her deverê. Sînor ji bê exlaqî, bê ûjdanî û ne mirovahiyê re jî nehiştine.
Di destê wan de, bi tinê mezinkirina TIRSÊ ma ye û hemû hêvî û baweriya xwe danin vê çekê. Çarenûs û dirêjbûna temenê zordariya xwe, bi vêna ve girêdane.
Bê gûman ev tengavî û naçariya wan, encamê têkoşîna lehengî ya Tevgêra Azadiyê ya li dijî wahşeta wan e. Hilbet ji bo binkeftina vê faşizma AKP-MHP’ê, rakirina alîkariya navdewletî divê. Her wiha ji bo xurtkirina doza gelê Kurdistanê jî zêdekirina piştgriya navneteweyî divê. Di vê çarçovê de serkeftina gelê Kurdistanê ne dûr e!
