Ahmet Aktaş
Bi navê “qenciyê” çêkirina Bendava Ilısuya Heskîfê, derbeyek mezin li dîroka Kurdistanê xist. Di 17’ê vê mehê de, li ser avakirina Pira-2’an a Heskîfê, R.Erdogan, pesindariya vê “xizmeta” xwe kir û êrîşî ser ên li dijî vê Bendavê derket kir.
Li Tirkiyeyê, jibo bazirganên bajarekî tê gotin ku “dikarin diya xwe boyax bikin û bifroşin bavê xwe”. Hema R.Erdogan jî, li ser gelê Kurdistanê û Tirkiyê bi heman zihniyetê, bazirganiyê dide meşandin. Lewma, 19 sal in, dikare ewqas însanan bixapîne!
Îca em vegerin ser mijara Heskîfê û bi giştî kiryarên wê zihniyeta wî ya xerabkar a li ser Kurdistanê.
Ji xwe di çarçova projeya netew-dewleta Tirka de, nav û naverokên her tiştên Kurdistanê; ji mirovan heta bajar, gund û hwd.hemuu ekolojî, diva bû bihata tine kirin an bihata guhertin/hilandin/asîmîle kirin.
Li ser vê projeyê, Heskîfa xwedî dîroka 12 hezar salî jî, kete ber êrîşa vê dewleta metinger û destdirêjî/tecawizê despêkir. Ji nav despê kirin, navê Hasan Keyf lêkirin. Lê li goreyî dîroknasan, navê wê yê dîrokî bi kurdî ye û ji Hesan Kef an ji Kevir Heste tê. Hesan, kevirê tûj kirina kêran, biviran, das û qalûçkan e.
Eger navê xwe ji Kevir Heste girtibe, heta dema dereng jî, hinek pîremêran, ev kevirê agirjenê, şwûna çaqmaq bi kartanîn û pirtir ji bo cigare pêxistinê dixebitandin.
Em vegerin ser zîhiyet û siyaseta R.Erdgoan a bi giştî li ser Kurdistanê dide meşandin. Divê were qebûl kirin ku heta nuha kesekî weke vî kabirayî, di derew û xapnadinê de nehatiye dîtin; ji vî karî re hunermendeki bê hempaye!
Him dibêje “Kurd birayên min e”, him jî dibêje “jin be, zarok be kî dibe bila bibe divê werin kuştin” û wisa jî dike. Him dibêje “asimile, gunehê herî mezine”(li Elmanya), lê vî gunehî ew bi xwe dike. Jiyana wî tije nakokiye û di vê nivîsê de hilnayê.
Bêgûman armanca wî û dewleta wî ya sereke; tinekirin an hilandina dîrok û çanda gelê Kurdistanê ye. Lewma em dibînîn kîjan cih û war û baweriyên dîrokî û bingehî yê vê civakê hebin, bi giranî êrîşî wira dike. Piştî bendavên Ataturk û yên din li ser Feratê; binavkirina Zeugma û hinek deverên din, Ilisûya Heskîfê jî temam kir.
Li aliyê din, zincîra vê qirkirina dîrokê ya baweriyê jî heye. Armanca êrîşa li ser Şingalê ya gelê me yê Êzîdî û li gel vêna baweriya Elewiya, mînakên li ber çavane. Êdî ji aliyê herkesî ve hatiya qebûl kirin ku reh/koka resen a gelê Kurd, Êzîdî û Êzîdxane. Ji xwe armanca zihniyet û siyaseta wan jî birîna reha dîrokî ye, tunekirina çand û pîroziyên civakê ne. Lewma ne li Şingalê-Êzîdxanê tenê, li Bakur û Rojava û Rojhilat jî armanca sereke ya wan, gelê me yê Êzîdî ye.
Ev zîhniyet û siyaseta R.T.Erdogan û dewleta wî, bêgûman ne bi serê xwe ne. Parçeyek ji siyaseta hegemonên cihanî ne. Lewma zihniyet û kiryarên wan û DAIŞ’ê weke hev in û desthilatiya cîhanî bêdeng e. Ji xwe gelek caran aşkere jî bi hev re kar dikin. Mînaka kiryarên DAIŞ’ê yên li Şingalê, Mûsilê, Palmîrayê û hwd.çi cudahiya wan ji kiryarên R.Erdogan hene?
Xwedê zane, êdî hatine qonaxa xwe ya dawiyê. Bi saya berxwedana gelê Kurdistanê û Tevgêra Azadiyê, êdî ji raya giştî re baştir hatine xuya kirin.
Ew destdirêjayî/tecawiza wan a li ser çand û pîroziyên Kurdistanê û di heman demê de ev êrîşa li ser mirovahiya cîhanî, nema ji wan re diserife, ew ber bi sergoyên dîrokê ve diteqizin!
