Leylan RESO/Qamişlo
Bi pêmana Roja Zimanê Dayîkê ya Cîhanê û bi durişma “Perwerdeya Bi Zimanê Dayîkê Mafê Bingehî yê Her Gelî ye”, li Qamişlo komxebatek hat lidarxistin.
Komxebatê, seat 10an li Hola Efrînê ya Qamişlo, bi tevlîbûna saziyên Rêveberiya Xweser û welatiyan dest pê kir.
Di civînê de hevseroka Desteya Perwerdeyê Kewser Doko, got ez Roja Zimanê Dayîkê ya Cîhanê li tevayiya çînên civakê pîroz dikim û diyar kir ku qonaxa heyî ya bi pêşengiya Kurdan wê ji bo qonaxeke nû bibe pirek.
Axaftvanan bal kişand ser du xalan. Xala yekê; Di Hiqûqa Herêmî û Navneteweyî de Mafê Perwerdeya Bi Zimanê dayîkê. Xala duduyan; Di Sîstema Bakur û Rojhilatê Sûriyê de Perwerdeya Pirzimanî û Pirçandî.
Derbarê mijarê de hevseroka Desteya Perwerdeyê ya Herêma Cizîrê Rohat Xelîl jî ev nirxandin kir: “Ev komxebat, bi pêmana 21ê Sibatê Roja Zimanê Dayîkê ya Cîhanê û ji bo girîngiya vê rojê ji bo gelê Kurd, Ereb û Suryan hat lidarxistin. Rêveberiya Xweser mafê her kesî daye ku perwerdeya xwe bi zimanê xwe bibîne. Ev roj ji me re pir girîng e. Heta niha xwendekarên me perwerdeya xwe bi zimanê xwe dibînin. Xwendekarê bi zimanê xwe perwerdeyê bibîne, hem afrînerî pê re çêdibe, hem xwe baştir tîne ziman, hem civaka xwe nas dike. Ji ber wê banga me ji aliyên pêwendîdar re heye ku nasnameya vî gelî qebûl bikin.”
