Nivîsgeha Parastina Zarokan di Nakokiyên Çekdarî de ya kantona Hesekê li gorî lihevkirina bi aliyên navneteweyî re hatî imzekirin, 6 zarok radestî malbatên wan kirin.
Li gorî lihevkirina di navbera Hêzên Sûriya Demokratîk (QSD) û aliyên navneteweyî de QSD`ê 6 zarok radestî Nivîsgeha Parastina Zarokan kirin.
Zarok li avayiya nivîsgehê bi beşdariya hevserokê nivîsgehê Xalid Cebir radestî malbatên wan hatin kirin.
Derbarê mijarê de Xalid Cebir got, li gorî lihevkirina di navbera QSDê û Neteweyên Yekbûyî (NY) de me 6 zarok radestî malbatên wan kirin.
Cebir da xuyakirin ku zarok ji ber gelek sedeman tevlî hêzên leşkerî dibin, yek ji wan sedeman jî mercên şer û bandora li ser wan e. Cebir da zanîn ku ji bo mijara tevlîbûna zarokan ya QSD`ê, rojane bi QSD`ê re dicivin.
Cebir di dawiyê de wiha got: “Tersê propagandaya hinek dezgehên çapemeniyê, QSD bi nivîsgehê re di vî warî de hevkar e û piştî pêşkêşkirina delîlan, gelek zarok radestî malbatên wan hatin kirin.”
Ji dema vekirina Nivîsgeha Parastina Zarokan ve 38 zarok radestî malbatên wan hatine kirin.
Nivîsgeha Parastina Zarokan ya Hesekê 6 zarok radestî malbatên wan kirin
