Komîteya Tenduristiyê ya rojhilatê Dêrezorê dermanê laşmanya, li welatiyên bi vê nexweşiyê ketîn belav kir. Piştî belavkirina derman ji sedî 77 nexweşî kêm bû.
Li rojhilatê Dêrezorê piştî derxistina QSD`ê ji herêmê, welatî vegeriyan malên xwe. Lê bi vegerê re, nexweşiya bi navê laşmanya jî ya bi “Heba Helebê” tê nasîn, li herêmê belav bû.
Welatiyên rojhilatê Dêrezorê, digel tinebûna derfetên tenduristiyê êşa zêdebûna laşmanya kişandin. Lê bi belavkirina dermanê Komîteya Tenduristiyê ya rojhilatê Dêrezorê li welatiyan belav kirî, jimara kesên bi laşmanya dikevin, kêm bû.
Rêvebera komîteye tenduristiyê Meryem Ewêd ev agahî dan: “Piştî vegera welatiyan, me dest bi hemleya belavkirina dermanê laşmanya kir. Me Sibata 2020 an serjimariya kesên bi laşmanya ketîn çêkir. Jimara kesên pê ketîn, ji Hecînê heta Baxozê 18 hezar bû. Piştî belavkirina derman jimar pir kêm bûye û niha 4 hezar nexweş man.
Rêvebera komîteya Teduristiyê Meryem Ewêd axaftina xwe wiha qedand: “Nexweşî di dema vegera welatiyan de belav bû. Bi taybetî li Hecîn û Baxozê. Çimkî her du herêm hatibûn roxandin û gelek gelaş lê kom bûbû. Ji bo wê me dest bi hemleya xweparastinê kir.”
