Ji ber êrişên artêşa Tirk a dagirker ên bênavber li dijî Eyn Îsa, metirsî hene ku genimê di depoyan de telef bibe. Ji ber ku aliyên pêwendîdar nikarin genim ji depoyan derxin.
Ji ber topbarana artêşa Tirk a dagirker û çeteyên wê ya li dijî herêmê, aliyên pêwendîdar ji 18`ê Kanûnê ve nikarin xwe bigihînin herêma depoyan a Mişêrfe ya Eyn Îsayê.
Ji ber topbaranê, depo û xetên kehrebeyê gelek zirar dîtiye.
Depoya Mişêrfe bi 2 kîlometre li bakurê navçeyê ye û bi 500 metreyan li rojhilatê rêya M4 e. Şîrketa Pêşxistina Civaka Çandiniyê bi armanca peydakirina ard ji 6 firinên navçeya Eyn Îsayê re, tê de 5 hezar û 400 ton genim depo kiribû.
Bi barîna baranê re û li gel zirarên ji ber topbarana ji hêla dewleta Tirk a dagirker ve, aliyên pêwendîdar metirsîdar in ku genim telef bibe.
Aliyên pêwendîdar di dema niha de, miqdara pêwîst a ard ji aşê El-Qerat ê li navçeya Çelebiyê ya kantona Kobanê re peyda dike. Ev aş mehane derdora 600 ton ard derdixe.
Li gorî aliyên pêwendîdar derdora 2 hezar û 100 ton genim li depoyên Mişêrfê ya Eyn Îsayê maye.
ANHA