Kesên nenas hevseroka meclisa bajarokê Til El-Şayir û cîgira wê piştî ku revandibûn, kuştin. Meclisa kantona Hesekê diyar kir ku sûcê hatî kirin di destpêkê de li dijî jinan e û ji bo têkbirina projeya Rêveberiya Xweser e.
Kesên nenas hevseroka meclisa bajarokê Til El-Şayir yê navçeya Deşîşa ya başûrê kantona Hesekê Seda Feysel El-Hermas û cîgira wê Hind Letîf El-Xidêr şeva Înê revandin û ber bi cihekî nediyar ve birin. Her du jin ji aliyê kesên nenas ve bi guleyan hatin kuştin.
Girêdayî mijarê Meclisa Kantona Hesekê bi daxuyaniyekê sûcê hatî kirin, şermezar kir. Meclisê got; ew sûc jî li “dîroka terorîstan ya reş” hat zêdekirin û armanc têkbirina ewleyiya herêmê û belavkirina tirsê di nava welatiyan de ye.
Meclisê di daxuyaniyê de got; komên terorîst Seda Feysel El-Hermas û Hind Letîf El-Xidêr ku hevseroka Meclisa Til El-Şayir û cîgira wê bûn, revandin û ber bi cihekî nediyar ve birin. Pişt re bi guleyan kuştin.”
Meclisê wiha domand: “Ev sûc di asta yekê de jinên di civaka herêmê de dikin hedef. Jinên ku xwe ji DAIŞ`ê rizgar kirin û tev li xebatan bûn, roleke aktîf di civakê de dilîzin, çekan radikin û bi mêran re parastina xak û gelê xwe dikin.”
Em banga xwedîderketina li QSD’ê û sekna li hemberî xirakirina aramiya li herêmê dikin. Em bang li gelê xwe dikin ku li hemberî kesên ku gefan li aramî û aştiya herêmê dixwin, bisekinin û li dora hêzên xwe kom bibin.”
