Hêzên Ewlekariya Hundir diyar kir ku wê destkeftiyên bi fedekariya şehîdan hatîn bidestxistin biparêzin û got; armanca milîsên Dîfaa Wetenî ji êrişa li dijî nuqteya me, têkbirina aramiya herêmê ye.
Êvara Şemiyê endamên “Dîfa Wetenî” yên girêdayî hikumeta Şamê êrişî nuqteyeke kontrolê ya Hêzên Ewlekariya Hundir ya li taxa Hilko ya bajarê Qamişlo kirin û gule lê reşandin.
Hêzên Ewlekariya Hundir di çarçoveya parastina rewa de, bersiva êrişê dan û li ser wê şer derket.
Girêdayî mijarê, Hêzên Ewlekariya Hundir ya bakur û rojhilatê Sûriyê daxuyaniyek da û tê de wiha got:
“23`yê Çile saet 6:00`ê êvarê, milîsên Dîfa Wetenî yên girêdayî hikumeta Şamê êrişî nuqteyeke kontrolê ya hêzên me ya li taxa Hilko ya Qamişlo kirin û gule li hêzên me reşandin. Li ser wê di navbera hêzên me û milîsên Dîfa Wetenî de şer derket. Me di çarçoveya parastina rewa de bersiva êrişê da û nuqteyên xwe parastin.
Em diyar dikin ku kiryarên bi vî rengî, ji bo têkbirina aramiya herêmê ye. Em ji gelê xwe re jî dibêjin emê destkeftiyên bi fedekariya şehîdan hatîn bidestxistin biparêzin.”